December 2017
S M T W T F S
« Nov    
 12
3456789
10111213141516
17181920212223
24252627282930
31  

2011/4/25 Day 43: 批牆、樓梯、花園鋪磚、木門等等進行中

話咁快就去到 4 月尾啦,距離我地現居交樓得返半個月左右!師傅們全部趕工中~連復活節呢四日假期都開工呀~真係辛苦晒!

進度如何?!

室內攪得 77 88 啦,牆身批好灰,聽日開始油油啦。窗框都安好晒,蚊網就最後先裝~

房門已經裝好,但係,大門唔記得叫和富開暗門鼓!而木工師傅又冇為意我地買左個暗門鼓放左係度,就已經裝好隻門,睇黎要聽日拆出黎整?!今次 d 門揀左比較淺既色,房門同廁所門就用左風鈴草色,都係簡單線條為主,而大門為左襯個門鎖,揀左隻近白白地既色~因為想同現居既薰衣草色有 d 分別~

係客廳,我地今次決定係梳化後果幅牆鋪磚,搵左隻凹凸紋冇咁深既類似文化石既磚做,效果唔錯,不過,Gary 話佢本身係諗住工字鋪的! >_<  但係我覺得都 ok 呀~

長形大廳就用左 T 字形燈糟,分開左客飯廳,燈糟同光管已經整好,未裝射燈啫。

電視機果邊既木工背板同樓梯底既飾櫃仔都攪掂,批左灰,之後會痴牆紙、做黑鏡、同燈~

另外,樓梯既木已經送到,師傅開始裝緊,木質都唔錯,每一塊板都好鬼重添!因為係木既關係,師傅都做好保護先裝完上去,應該等搬完屋之後我地先拆啦~

廚房就已經鋪好晒磚好耐啦,不過今日比我發現,有 5 小塊磚係鋪錯左!點解話係小磚,因為係邊位既小塊,而師傅又唔記得對果堆暗花!聽日要去補磚~而個三相電箱就已經裝好左啦,好大個呢!!另外,廚房門框就已經裝好,而門就會係灰玻璃門,呢個未裝~

至於一樓,就主要係批灰。廁所都已經鋪好磚啦,我就覺得唔錯~我地今次仲預備左閃銀掃口粉,整完出黎我估會幾靚卦,但係要星期四先有貨呀!!!

閣仔都油好油,鋪好地啦,所以我地都搬左 d 立雜野過去。

而室外呢,後花園已鋪好地台同圍牆磚,戶外木就會呢個星期裝埋~

我地保留左舊屋呢棵樹,入伙後會買 d 矮身少少既花花放旁邊既~

後花園既儲物櫃外面攪掂,內籠就未攪!

而露台就鋪好地,櫃仔攪掂,欄杆同戶外木地台未整!

另外,廚櫃同廁所櫃星期四就送貨,星期六會安裝。傢俬應該下星期中送貨同安裝,其他野都會下星期尾同再下星期頭送貨啦~

2011/4/10 Day 28: 泥水繼續、木工及窗框進行中

話說 4 月 7 突然好快咁整好左地下既地台,4 月 8 就又鋪好左大半既二樓地台啦~突然進度良好~希望月尾就攪掂啦!

今日再係日頭去望下,依。。。廳房地磚攪掂晒,做好保護,腳線都整好添~

另外,早兩日同木工師傅傾左燈糟呀,立雜野咁,已經做緊啦~主人房本來果個奇怪位,拉直左牆身,入面整好左木板,方便傢俬黎果時安裝~

樓梯底個飾櫃大致見到個樣啦,而牆身背板就做到一半~

櫃梯角位儲物櫃都見到個樣 lu~

至於之前已經送到既窗框,全部已經上晒牆~

另外,今日都同裝修師傅傾左好多立雜野,我估跟住呢個星期會做門、窗、舖廚廁同花園啦~如冇意外,屋內應該月尾會攪掂啦~

2011/4/7 Day 25: 泥水繼續

今晚又過去望下,嘩!竟然有意想不到既進程。。。就係地下既地磚已經鋪好啦!不過太黑,唔係好見到~但係望落去都唔錯喎!

2011/4/3 Day 22: 泥水進行中

今日去完拜山返黎,緊係要去望下間屋啦,竟然有新進展喎!

廚房砌得七七八八啦,差唔多可以搵廚櫃公司黎覆呎 lu~

有暗波浪紋既,大家覺唔覺呢?!

後花園兩個櫃就做緊泥水,已經有個型出黎啦~

廁所浴缸同企缸位都砌好左,做緊防水~

希望快 d 攪掂啦~

2011/4/2 Day 21: 泥水進行中、磚及鋁窗送到、傢俬覆呎

已經開始做泥水啦,今日終於見到有 d 完成品啦,就係。。。洗衣機櫃啦,面磚都砌好啦~

而廚房都砌好左一幅牆,不過太黑啦,所以冇影相~

而鋁窗竟然係 6:30pm 左右送到,咁岩我在場!好多呀!!~應該下星期裝啦卦?!

另外,大部份買既磚都送到 lu~

600 x 600 既地磚,會用黎舖晒全屋既地台~個面係有凹凸既,同埋有暗閃,淺灰色~

花園圍牆磚,呢款連師傅都話舖出黎應該會幾靚喎!好期待呀~~

廚房地台磚,牆身磚暫時未摷到,哈!

廁所牆身磚,廁所地台就同款唔同色的~

露台地台磚,呢款我好鍾意,閃閃既~

唯一係大陸買既大廳牆身磚~

2011/3/27 Day 15: 水電埋尾、泥水入場

今日再去睇下,水電應該差唔多埋尾啦~

呢個係廚房新既三相電箱同埋膠喉,有幾條都係超粗既!

一樓廁所就砌緊浴缸同企缸位,呢 part 既水電應該已經完成啦~

露台上左英泥~屋入面既喉位鋪緊水泥啦,而後花園就砌緊櫃仔!