Day 4: 11/2 (Tue) 晴
大磯 
御殿場
早：大磯プリンスホテル
午餐：御殿場－寅褔
晚餐：御殿場－韓の食卓
住：大磯－スーパーホテル御殿場 (Super Hotel Gotenba)
今日我地主要去兩個地方，就係土方柑橘園（ひじかたかんきつえん）同埋御殿場プレミアム・アウトレット (Premium Outlets) ，所以都係休閒既，咁我地就成 9:30am 先落去食早餐，今次又係對住個海食，由於都比較晏啦，所以都冇咩人，野食就種類多，味道普通啦，不過不失。
之後我地就出發去土方柑橘園啦，黎日本咁多次都淨係試過摘士多啤梨，今次見十一月有柑食，當然要去試下啦。大磯附近都有好多柑園，咁我地係網度搵左間比較易去既，出發之前已經同果園聯絡過，園主話今日會有幼稚園黎，如果到左冇人呢，就打電話比佢或者等一陣咁～不過原來真實地址都幾難搵，係附近兜左陣先搵到，佢個聯絡地係民居黎既，跟住就帶我地渣去果園果邊啦～
果園都幾大，去到只見成個山頭都係柑樹！原來 d 柑樹都唔係太高既，但係見有幾個唔同品種，有大柑同細柑，園主帶我地去到其中細柑果邊，教左我地點樣摘：要用剪刀係近枝貼住個柑果度剪，如果唔係，放入袋果時就會桔爛其他柑啦。另外，同士多啤梨唔同呢，就係佢會比個袋我地，我地可以盡情係果園度一路摘一路食，同埋仲可以帶走，個袋裝到幾多就可以拎幾多走，係冇限定時間既～
我地摘柑既策略就係，先揀幾棵睇落唔錯既柑樹，跟住係果園度即食一個，如果甜呢，就係果棵樹度剪多幾個拎走！我地摘幾個之後，就見園主帶同一大班幼稚園學生同埋佢地既家長一齊黎到，我估應該係學校親子活動啦，本來果園得我地兩個係度，跟住就變左超多人啦～
由於係食左早餐冇耐，我估我地係果園度大約食左十零個柑左右啦，雖然我仲可以再食，不過 Gary 話柑唔可以一次食咁多喎，唯有摘走啦，最後塞到個袋滿晒，摘左成廿幾個拎走，之後幾日都唔駛買生果 lu～如果係香港買，大約 $40-$50 先有 8 個呀！～
玩左半朝之後，我地就渣車過御殿場プレミアム・アウトレット啦，車程大約 1 個鐘。黎得 outlet 就緊係諗住 shopping 啦，而呢日亦係唯一既一日我地預朝 shopping 既。
到左後，行左幾間舖我地就搵野食啦，最後揀左間睇黎普普通通既日式野「寅褔」，係冇咩期望之下反而覺得唔錯喎！入去先係門口揀野食同比錢，跟住坐低就有員工拎三盒前菜黎，話食晒可以免費 refill 的，其中既肉碎炒豆超好味！
另外，跟餐既飯可以揀白飯、穀物飯或者五色飯，我個豬肉定食就叫左穀物飯，而 Gary 既咖哩吉列豬扒定食就要左白飯～飯、湯、椰菜都可以 refill 既，幾樣野都好好味，而我地最後只係添左一次肉碎炒豆～
食飽就去行街街啦，呢個 outlets 同其他 outlets 都冇咩大分別，一樣係好大，亦都好多舖頭，但係可惜個匯率太高啦，行左好多間都覺得冇咩意欲想買～最後只係買左呢個 Porter x Nikon 相機袋，佢大細岩晒我，而且仲可以放一機兩至三鏡，雖然貴少少，不過香港同日本好多地方都冇得賣，咁岩呢度有間 Nikon Shop 先有咋！同埋係 Franc franc 買左呢隻熊貓做手信～
跟住，我地就離開呢度，渣車周圍兜，咁中途經過幾間 local 百貨公司、超級市場就入去睇下，買左 d 立立雜雜野就返酒店啦～
今次係呢度都係住スーパーホテル御殿場，スーパーホテル我地都住過好多次啦，平得黎又真係幾好，推介！
去到 6 點幾，我地就渣車出去搵野食，決定今晚食燒肉，就揀左一間比較大既食店韓の食卓，中價啦，都有多款野食，由於我地比較早去到，唔駛等位，後尾到 7 點幾，人就比較多啦～
佢係 touch screen 自己叫野食既，我地就 order 左兩個唔同既 set ，有雞、唔同既牛部位、豬、蔬菜等等，再加其他野食，慢慢食左兩個幾鐘就返酒店 lu～
最新回應