December 2017
S M T W T F S
« Nov    
 12
3456789
10111213141516
17181920212223
24252627282930
31  

裝修入伙篇之最終回﹣完成品篇 02

跟住上一樓睇下~

走廊櫃同樓梯燈o既效果~

由主廁望出去走廊

 

充滿文化氣息既書房

 

書房隔離係客房(不過依家好似變左做健身房?!),放左由舊屋搬過黎o既 2 個書櫃,同埋我個琴。

 

隻細喵依家好鍾意係屋入面望街~

再望下個主人房先~除左新做o既傢俬之外,只係放左舊有o既按摩椅係度,而近衣櫃位就放左支衣物柱~

 

最後,睇下個爆鑊最多o既主廁~

 

仲有,價值成萬銀o既 Rainshower 花灑!

另外,二樓閣仔亦都放好晒層架呀、膠箱等等,所有屋企雜物都放晒上去,所以屋企睇落好整齊~

裝修進程分享黎到呢度已經係尾聲喇,當然仲有某D地方係想改進下,譬如話飯廳同客廳放左舊屋帶過黎既枱同几仔,效果太細所以之前睇左一張大D同埋襯D既枱,不過要成萬五蚊!!所以執筆時仲未捨得買…… 仲有後花園招呼親朋既燒烤爐呀,後花園種菜用既堆肥機等等都仲係物色中….. Anyway, 都多謝咁多位網友一直追住我地呢個 blog ,畀到既意見實在好有用,同埋多謝咁多位既支持~  有機會再會不定期更新後加既靚野啦~~~

裝修入伙篇之最終回﹣完成品篇 01

終於都到左成個裝修進程 blog 既最後一回,因為相片比較多既緣故,分開幾個篇幅再介紹下。

首先話比大家知,我地已經係 9 月入左伙啦,不過入伙前同入伙後,執野、pack 箱、搬野、拆箱、再執野,真係辛苦到暈~~尤其係搬完野入黎之後,冇啦啦發左幾日高燒,之後又要等呢樣送貨,果樣送貨,終於到今日叫做攪掂晒(攪左成 2 星期),可以見得下人,所以就叫左老公影左相,上黎 update 下啦~

同之前一樣,先睇下個外圍~


至於之前乜都未有o既前花園花槽,經過尋日o既 DIY 之後,就變左咁啦~所有木柱仔、石春仔、花泥、樹仔、同埋幾棵花仔,都係我同老公 2 個一手一腳由 Raw 整成o既~遲 d 等 d 紫紅色花開埋,應該會靚 d ~

至於後花園,花槽範圍我就諗住用黎種菜,好似生菜呀、士多啤梨呀、青瓜呀、蕃茄果 d ,咁我地就鋪好地,起左支架,等我 d 苗大 d 就可以種菜啦~

  

地下入屋向右望就係客廳,係梳化旁有棵喵樹,而梳化上方就係連住喵樹o既喵跳台。

 

而係大門向左望就係飯廳啦~

 

飯廳前面係開放式廚房


由飯廳望去客廳


由客廳望去飯廳

而係客廳一角,就係地下o既客廁,入面有喵廁所、企缸、同埋一個雜物房。

 

2009/9/2 Day 67: 廚房修飾中、主廁重裝、客廁浴屏窗簾攪掂~

距離收樓仲有兩日,今日又心思思入去睇下~

未入屋,就係落地玻璃度見到已裝好窗簾,又話星期六先裝o既?! 咁緊係即刻入去睇睇~

入到去,嘩,我個廚房收口黑鏡終於整好~真係幾靚!~

另外,爐頭果邊o既強化玻璃同埋不锈鋼,就差唔多攪掂,抽油煙機都裝左上牆啦~

再望下隻窗,嗯,窗簾都整好左~而水龍頭都裝返好~咁依家個廚房就淨係差個假天花燈同埋微波爐位果邊o既玻璃o者~

再睇下個廳,全部窗簾都裝好左~今次我地個廳主要揀左木百葉做窗簾,因為傢俬已經係深色,所以揀左淺色o既。而因為前後花園個落地玻璃門太大,要一開二,頭先拉過,開二之後都重係好重下!而廚房果個窗簾,就用左鋁百葉,不過都係木紋款o既~

另外,客廳飾物櫃都裝好左玻璃同射燈啦~不過比我發現有一層玻璃層板斜左!星期六要同師傅講先得~

地下客廁個浴屏就已經裝好,不過欠左個把手,浴屏公司話要再同廠訂返,之後再安排安裝,咁我地係咁易試左水,發現有漏水o既情況發生,下次要師傅黎裝返個把手o既時候,要叫佢攪攪佢~

至於一樓主廁,上星期同師傅傾左,櫃仔、鏡、鏡燈、吊櫃仔全部都要重裝,攪到有幾塊面磚要換,假天花要拆。。今日去到,天花拆晒落黎,不過面磚已經換好左,聽日就會裝返晒所有野啦~而今日都影埋之前裝好左o既浴缸同浴屏,個浴缸裙邊都應該聽日會裝埋,咁就會成個靚仔晒啦~

至於花灑,上星期六都已經裝埋 lu~

而一樓o既三間房,都已經裝好左窗簾,我地就揀左卷簾,由於要揀遮光料,所以都係揀左比較簡單o既款式,淺色為主,再加少少暗花咁~但係影相出黎,好似變左淨色~哈哈哈~唯有等入伙之後,日頭再影比大家睇睇啦~

2009/8/29 Day 64: 主廁浴缸花灑完成、廁所櫃重裝、客廁企缸浴屏裝好、窗簾收貨~

今日冇影相,只係分享一下進度~

主廁浴缸、浴屏水龍頭、花灑、坐廁等已經裝好啦~至於再爆鑊o既廁櫃、鏡等,就同師傅現場傾左依家想點樣攪。都幾麻煩,要拆晒 d 野落黎,跟住拆左個假天花,拆三塊磚,再鋪過,等 d 磚乾,之後再裝返 d 櫃(包括主櫃、洗手盤o既水龍頭、鏡、鏡燈、側櫃)上去,大大話話都要三個半日~不過藉得安慰o既係,現場試左個 rain shower o既效果,真係唔錯~另外個浴屏都唔錯~哈哈哈~

下晝浴屏公司黎裝野,約左 3:30pm,不過都成 4 點幾 5 點先到,兩個師傅裝左成個幾鐘先攪掂,不過,最後師傅話「之後再約時間黎裝返。」即時問佢咩事,原來個浴屏門手柄冇左!佢話要等公司補返先再約黎裝,都冇法啦,不過都可以用o既~過幾日等 d 膠乾左要試水先得!

今日個書房同主人房已經開始清潔啦~見到個阿姐將書枱櫃桶一個一個咁抺,有潔易亮、玻璃水等等,抺完真係乾淨左好多!

仲有一樣今日攪o既,就係廚房個強化玻璃同不锈鋼,仲有抽油煙機、掛樋位置等等,今日都同師傅傾好,下星期初就會攪掂啦。

另外,全屋窗簾都收左貨,上星期日訂o既,尋日已經做到,今日送貨,包裝都唔錯,初步度左 d 呎吋,完全o岩晒~yeah~

最後同師傅傾左 d 需要執漏o既地方,而佢都再 confirm 我地,星期五可以交樓,仲叫我地層架、窗簾、立雜野果 d 可以星期六裝,叫我地星期六最好早 d 入黎!好耶~終於都到岸啦~

下星期六仲有好多野攪,約左 PCCW 搬電話線、BN 線、NowTV 等,隻 Rack 會送貨,老公要攪埋個 network、IP Phones、IP Cams,而床褥同戶外鞋櫃都會送貨。我就除左等送貨之外,要同師傅夾層架、窗簾、毛巾架、掛樋、廁紙架等等!真係超忙呀~

2009/8/27 Day 62: 主廁廁所櫃、全屋燈飾安裝進行中~

8 月中訂造o既戶外餐枱椅話今晚會送到,咁我地就入左去收貨啦,本來仲諗要到 9 月頭先攪掂,實在係好快!

入到去,見到花園圍牆玻璃已經裝好晒,而前花園o既三盞柱頭燈、射燈、後花園射燈、車道o既除水光管都全部攪掂,用得!

跟住入屋睇睇,廚房枱面整好啦,而水龍頭同櫃底濾水器都裝好左~另外,假天花都整好左,而收口位o既黑鏡就整緊。

 

而兩個廳呢,客飯廳o既燈糟、飯廳飾櫃射燈、同埋飯廳燈都裝好左~不過有少少問題,就係客廳個飾櫃位,唔夠位裝我地支射燈,差 10cm 左右,攪到要再另外買多 2 盞比較矮o既~今次我地用左 3W LED 射燈,現燈睇個效果真係幾唔錯,不過今晚我用左閃光燈影,所以係 d 相度,果效果唔係好見到。

 

我地訂造o既戶外餐枱椅就暫時放左係個客廳度,總共有 8 張椅,4 張有扶手,4 張冇,其中 2 張有扶手o既係會放係書房用~而 d 椅又可以疊起,之後應該會放 4 張係後花園,仲有剩果 2 張會先收起囉~

跟住上樓睇睇,走廊燈同走廊飾櫃o既燈都已經用得 lu~

 

而書房同客房o既吊燈都裝好,不過好似低左少少,要叫師傅裝返高 d 。另外,書房吊櫃門都裝好,但係就未裝門柄~

另外,主人房之前欠左果個床架,都整好啦~呢個好好笑,因為係木工師傅唔記得左要做床架,佢諗住已經攪掂晒,佢 d 工具都已經運走左~咁我就同師傅話,我係地下 d 廢料度見到幾條木條,送左黎好耐,我一直以為係用黎做床架o既,點知又冇用到,不如拎黎用~咁佢話,係雜物房個門框用剩o既,之後就用左黎做個床架啦~所以依家個床架係有我個門線果條凹凸紋係中間o既~好靚~哈哈哈!

最後,就係個主廁啦,所有野都已經裝好左,包括浴缸、座廁、主櫃、鏡、側櫃~但係睇睇下,我就覺得點解同我開頭個 design 好似唔係好同咁,個主櫃好似細左喎!個鏡又唔係咁裝喎!仲有..個鏡燈同個側櫃點解咁高o家!

跟住,即刻拎把拉呎度下..個主櫃..本來應該係 125cm,依家得 105cm,細左足足 20 cm !本來塊鏡係打橫放,即係上下黑邊,比櫃短 20cm (兩邊各有 10cm 位剩),依家變得打直放,咁個鏡燈去到假天花咁高。另外,個側櫃,因為係要同塊鏡齊頂,變得好高好高呀~

嗚嗚~唔知點攪好~同老公傾過之後,有以下幾個解決方案:

1)淨係將塊鏡打返橫放,個側櫃同鏡燈就可以改返低 d ,望落去冇咁奇怪(最簡單快捷o既方法);

2)打返比做櫃果度,同佢講做錯左,要佢再造過!跟住所有野跟返開頭個 design 咁整(不過 1 星期應該唔夠時間?);

3)係香港買過另一個 125cm 長o既櫃,replace 左依家呢個,其他野就跟返開頭個 design (時間唔知要幾耐,櫃料可能同側櫃唔 match?!)

4)叫木工師傅即場再造 125cm 長o既櫃,replace 左依家呢個,其他野就跟返開頭個 design (應 2-3 日左右攪掂,但係櫃料都可能同側櫃唔 match!)

其他方法未諗到,各位 Blog 友有咩意見?!

2009/8/24 Day 59: 廚櫃枱面、主廁、圍牆玻璃安裝進行中~

本來都唔係好想寫,不過既然影左幾張相,就寫少少啦~

今日下晝廚櫃公司約左裝枱面,請左半日假,諗住等佢攪掂就比埋 d 尾數,亦都想現場檢查,有咩問題都可以即時攪掂嘛~

師傅 2:30pm 打黎,話會 3:00pm 左右入到去,話會裝大約 2 個幾鐘,咁我就大約 3:20pm 入到去,見到有半張枱面係度,但係又唔見人喎~等等等,等到 4:00pm 咁上下,都未見人,就打返比個枱面師傅,點知。。。佢話另一塊枱面整錯左!要拎返廠果度改!

Oh, my god ! 點解會咁o家,之後打比廚櫃公司去了解返件事,就話係放電磁爐個位開錯左少少,要返廠整,(香港廠,唔係大陸),咁最遲星期三就攪掂,咁我話,我唔可以拎咁多假入黎睇喎,佢就話叫我裝好,check 完之後先去佢地公司比錢就得啦,咁都好 d ~之後,廚櫃公司再打返比我,話聽日個枱面就得啦,下晝 3:00pm-6:00pm 會再黎裝,咁我就唯有聽日放工再入去睇睇啦~

呢張就係裝左一半o既枱面啦~

另外,我地上星期去郵局申請左搬遷服務,點知郵局整錯左個 effective date 係 8 月!所以,上星期六叫師傅幫我地整左個信箱先,今日見到已經攪掂啦~

而圍牆都開始裝緊玻璃,今日裝左一半左右,我估多一至兩日就會裝好 lu。

至於屋內面,冇咩大變動,師傅都係執緊 d 手尾,好似閣仔地板、樓梯邊o既o即膠,櫃o既玻璃等等~

另外,今日都同水電師傅傾左個主廁浴缸、龍頭位置等,又同佢講左之前買落o既燈、門鐘等等野比佢,應該呢個星期都會裝埋啦~