August 2019
S M T W T F S
« Nov    
 123
45678910
11121314151617
18192021222324
25262728293031

Day 12: 2010/04/08 松本、平湯

Day 12: 4/8 (Thu) : 晴

飛騨高山  飛騨大鐘乳洞  松本  平湯

早餐:高山-スーパーホテル飛騨・高山
午餐:松本-Soba 食事處
晚餐:平湯-匠の宿 深山桜庵之一泊二食

住:平湯-匠の宿 深山桜庵

本來今日既行程係去上高地既,咁會住係平湯溫泉果度,再搭巴士過去,不過因為佢 4 月尾先開(一年中有半年係唔開既),所以出發之前二星期左右就改左諗住先去白川郷,但係尋日去完飛騨の里之後,大家又唔係好想今日去喎,因為我地 3 個都好怕又要著鞋又要除鞋咁。另外,尋晚睇天氣報告話今日會天晴,所以我就提議不如睇下有冇近近地,有櫻花既地方去影相啦~但係,係高山附近真係冇乜好地方,最後我就揀左松本城,都要渣粒幾鐘車,不過都冇咩所謂啦,見網站話果度應該係差唔多滿開既!而白川鄉就留返之後果日先去啦~

於是,我地今朝係酒店食完早餐就執好行李離開高山啦~係去松本途中,見路牌寫住行多 10km 左右會去到飛騨大鐘乳洞,咁問左小花想唔想去,佢又話想喎,咁我地又加插左呢個行程啦~呢個當然係渣車去旅行既好處之一啦~哈~記得之前我同 Gary 係 Honeymoon 果時就已經去過沖繩既鐘乳洞,今次係飛驒呢個睇佢個介紹,原來佢地 2 個都係日本七大鐘乳洞之一,唔知我地會唔會有機會再去埋其他果幾個呢?!我地係館外買左入場券之後,就先去左鐘乳洞外既大橋コレクション館度參觀,不過我地覺得冇乜特別野睇,用左大約 10 分鐘左右,好快就行完啦~入面最特別既野係展出左一塊好大既金塊,當年係比人偷左,之後只係搵得返某 d 部份~

跟住我地就入左鐘乳洞啦,佢有 3 個出口,全部行晒,要大約 30 分鐘啦,佢個指示話第一段路係最平坦既,亦都最多野睇,而一路上第二段同第三段就會係比較斜同窄,如果行唔到斜路既,就可以係第一出口同第二出口果度離開。不過既然我地比左錢,咁緊係要行到最尾啦!我地沿路一路睇,一路影下相,仲要休息下,都行左成個鐘先出返去。另外,可能因為時間仲早,成個鐘乳洞入面都係得我地三個,所以大家都覺得幾唔錯~

 

 

 

之後,我地就向松本城出發,沿路都見到有少少櫻花,因為今朝去埋鐘乳洞既關係,黎到松本已經成點啦,所以我地係松本城附近食完午餐先去睇櫻花。呢間舖頭係一間比較舊式既餐廳,我叫左個天婦羅湯烏冬、Gary 叫左個豬扒定食、小花就叫左個天婦羅冷麵定食。總括黎講野食都叫做 OK,但係我果個湯烏冬就好難食,因為煮得太耐,d 麵條都淋晒。。。所以我後尾係食左半個 Gary 既餐既。。。

 

 

食飽之後,係松本城外圍行下影下,好快就過左兩個鐘,我地冇特別比錢入城度睇,雖然都唔係貴,不過大家話覺得唔抵喎!同埋外圍既櫻花都已經好靚~

 

 

  

 

 

跟住,我地就拎車,返今晚既酒店啦~今日天氣真係唔錯,沿路我地仲離遠望到雪山,我估應該係立山黑部(日本既阿爾卑斯山)果邊,真係幾靚,要搵次機會去果度加埋上高地先得~

 

 

匠の宿 深山桜庵係一間高級既溫泉酒店,間酒店都幾大,由門口到大堂都要渣一小段仔路。

 

 

因為我地唔係日本人,佢地特登搵左個識英文既職員黎招待我地,係大堂 check-in 完職員就帶我地返房啦。今次我地住 3 人既洋式房,間房都幾大,仲有個半開放式浴室同埋按摩椅,窗外既景美亦都唔錯。

 

 

  

係房 hea 完,我地見都仲未天黑,咁我就提議話出去行下,見天氣咁凍,而酒店門口有個足湯,我就話要試下,咁小花同 Gary 當然都唔執輸黎試下啦,點知原來 d 水係超熱既!

玩完水,因為實在太凍,而我地又冇著褸,所以好快就返酒店啦。記得係酒店網頁,係話有得上網既,但係我地係房同酒店大堂,都搵唔到上網既地方,原來佢係有個 Reading Room 咁既地方,入面有個 Lan Port,不過佢有個牌寫住 service unavaliable,暫停使用!咁我地 3 個 IT 人緊係唔信斜,諗住食飽飯之後落黎攪攪佢~

 

 

酒店除左大浴場同露天溫泉之外,另外有 4 個貸切風呂(2 個露天,2 個室內)比客人免費使用,咁我緊係要去試下啦~因為要打電話去卜,所以我地食飯前就卜左飯後 1 個鐘左右去浸啦,橫掂都包左係個價錢度啦!

今餐我地食燒烤,有幾款和牛既,同埋有蔬菜,野食好美味,但係份量就好似少左 d ,食飽都唔係好夠咁囉!點知食完飯,諗住走果時,招呼我地張枱果個侍應同我地講,原來 11pm 係大堂 lobby 有免費宵夜,而第二朝早餐後仲有免費咖啡添!

 

 

 

飯後我地都好忙,我地係房 hea 左陣,就去左浸溫泉,不過因為 d 水太熱,而室外溫度又太凍,所以我地好快就返房啦。而小花就自己係房沖涼,跟住走左去攪人地個上網野,點知又比佢攪掂左喎,可以上到網!之後我地緊係去食宵夜啦,有即煮既拉麵,都幾多人黎食,食飽我地就返房訓 lu,而小花就繼續係大堂度上網啦~

Day 11: 2010/04/07 飛騨高山

Day 11: 4/7 (Wed) : 雲

飛騨高山

早餐:高山-スーパーホテル飛騨・高山包早餐
午餐:高山-食事処 寿楽久
晚餐:高山-拉麵

住:高山-スーパーホテル飛騨・高山

雖然我地係高山住呢間酒店係好平,不過都有包早餐o既,但係當然 d 食物比較簡單啦~咁係酒店食飽之後,我地就行去宮川朝市啦,大約行十五至二十分鐘左右啦~

宮川朝市,顧名思義就係宮川(河)邊,由鍛治橋至到彌生橋附近,由幾百年前已經有檔販係呢度攤擋架啦,主要係賣自家製o既食品、手工藝品同埋農產品,夏天大約朝早 6 點就開檔,而冬天就遲 1 個鐘,約 7 點開檔,通常開到正午左右,所以要去逛就要早 d 起身啦~

我地行到黎都差唔多 10 點半,唔知係咪平日o既關係,朝市o既檔攤冇我想像中咁多,而且亦都只係得三五個遊人~所以我地買左 d 手信,試左呢度出名o既牛奶,就走 lu ~

另一樣宮川朝市出名o既食品:牛肉饅頭,不過我地食完早餐已經好飽,食唔落,所以冇買~

之後我地行去上三の町 古い町並果邊,都係行十零分鐘啦~係途中,經過間高山專賣木製產品o既店舖,不過因為入面唔比影相,所以比唔到大家睇,另外因為全部都係用木製造,所以就比較重,雖然好多野都想買,但係最終只係買左一件啫~

上三の町 古い町並,係高山市入面最熱鬧o既古街,佢由幾條街組成,而呢幾條街o既兩邊全部都係工藝店、小食店、味噌店等等,我地一邊行,一邊影下相,好快就到左食午餐o既時間啦~

 

今日我地揀左係上二之町o既食事処 寿楽久度食,佢係一間老店,主打味噌料理同埋飛驒牛料理,我地叫左三個唔同o既餐黎 share 食,食到好飽呢~

味噌飛騨牛餐:

味噌豬扒餐:

飛騨牛井:

跟住,我地就返酒店拎車,出發去飛騨民俗村 飛騨の里,車程都只係 3km 左右,果度係要入場費的,不過,我地 3 個都覺得入面冇咩野睇,但係通街都有廣告,好似好靚咁,覺得比人呃錢咁!!

比錢入去之前睇個圖,好似好多野睇咁。。。

合掌屋,我地會去白川鄉睇。

不過都好彩,我地 3 個都係冇乜所謂o既人,唯有係入面自我娛樂一番,睇下我地做過咩啦~哈哈哈~

之後,我地係去左民俗村附近果個體驗教室,點知都係冇野攪,乜都冇體驗到。。。比起富良野個芝士工場體驗教室差好遠呢~

由於呢兩度都冇野好睇,我地好快就走左啦~而高山呢邊又冇其他特別景點,咁我地就決定渣架車周圍去,見到有大商場就入去行,渣左 10 分鐘左右,就見到一個大百貨公司,咁我地就去左食 Tea 同埋行 supermarket 啦~

之後,我地就返酒店執行李,因為聽日離開酒店啦,而我地已經買落唔少手信!係時候要齊理一下~而晚餐由於 Gary 唔舒服o既關係,我同小花就行左去高山駅附近食拉麵,食飽仲去埋便利店甜品做宵夜呢!

好攪笑,食蕃茄拉麵有蒜蓉包送 XD

Day 10: 2010/04/06

Day 10: 4/6 (Tue) : 晴時時雲

下呂  飛騨高山

早餐:下呂-くつろぎの宿 神明山荘之一泊二食
下午茶:高山-IF Cafe
晚餐:高山-丸明

住:高山-スーパーホテル飛騨・高山

經過尋晚係酒店好好休息完,今朝大家都好精神,而天氣都比尋日好左,起碼冇落雨啦~跟住我地就去食豐富o既早餐啦~

食飽 check-out 之後,就係酒店附近周圍望下同埋影左 d 相,因為尋日太大雨冇影呢~其實睇真係,間酒店唔係下呂溫泉鄉,而係トロン溫泉o家,又會係咁o既?!

跟住,我地就向高山o既高山陣屋出發,由酒店去高山,車程只係約 65km,不過就要行個半鐘左右。係中途經過真正o既下呂溫泉,但係我地就冇轉入去行,本來諗住尋日去,尋日又落大雨冇去,唯有寄望下一次啦~

咩叫陣屋?佢其實係御役所(行政、財政、警察機關)+御蔵(存放納貢米o既倉庫)+役宅(地方首長居所)。而高山陣屋原本係高山城主金森氏o既官邸,不過係德川幕府主政後,由幕府時代到明治時代,為左管理飛驒國,佢成為代官所及郡代役所o既的政府辦事處(類似中國衙門),係高山權力象徵。而係明治維新之後,高山陣屋就變左高山縣廳舍,係日本至今唯一仍保存o既地方廳舍。

黎呢度,主要係睇佢o既建築風格,同埋佢o既歷史、保存o既文物。雖然呢種建築對我同 Gary 黎講好似似曾相識,但係都幾得意,望下古代官員o既辦事處、招待客人o既地方、比官員休息o既茶房等等,都可以好休閒咁參觀。

 

陣屋前係有個陣屋朝市o既,不過我地到果時已經差唔多到中午,佢地都開始收檔啦,而我就本來係諗住係高山只係參觀宮川朝市,所以呢個朝市我地就冇編排係行程之內啦~

跟住時間仲早,我地就去另一個景點桜山八幡宮。係西元 377 年(仁德天皇時代),為左祈禱戰勝惡魔建造既,之後就一直鎮守高山千幾年。而係每年 10月 9-10 日o既高山祭,就係呢度舉行。

 

除左鎮山之外,好多熱戀中o既情侶都會黎呢度,祈求愛情能夠開花結果。我地又睇下可以點求籤啦~

桜山八幡宮隔離,有高山屋台會館,入面有高山祭巡遊o既屋台,同埋會播映巡遊o既 video 比遊人睇,不過入場費要成 820 yen,係大家商量之後,就決定唔入啦~

係參觀桜山八幡宮果時,見到地圖寫住佢o既後山有櫻花睇,於是我地就行上去睇啦,點知大失所望!只見到山後係一片爛地,花都冇棵!

之後,我地就渣車返酒店啦,呢兩晚我地會住係スーパーホテル飛騨・高山,佢算做好平,而且又近車站,位置都幾好,當然以呢個價錢,房間 size 就比較細啦~

係酒店 check-in 好之後,已經 3 點半 lu,因為今晚諗住食飛騨牛,所以我地只係酒店對面食左個 tea。

小花o既咖啡、brownies、多士:

Gary o既咖啡同雪糕~

我o既士多啤梨奶同三文治~

呢間 Coffee shop o既咖啡就麻麻地啦,不過小食非常好味!另外,唔講唔知,高山呢度有好 coffee shops ,又有勁多外國人,我地一路食 tea,只見不停有外國人入黎,或者係門口經過,真係以為自己去左外國咁!

食完 tea 我地就去左附近周圍逛,行左好幾間賣手信o既舖頭,各人都買得好開心!另外,高山o既好多景點都係站附近,可以行路去o既。

跟住,我地返酒店放好戰利品,就行去食晚餐啦~我地今晚係去度食飛驒牛。

我地揀左食すき焼き,叫左 3 種唔同o既飛驒牛試,好彩之前係小西屋有人 Serve ,所以我地知道點先係正確煮食方法!

至於飛驒牛有幾好味,睇下啦~~(呢條片較多,仲有 d 悶添~)

食完三碟牛、配菜之後,其實已經好飽,但係因為最貴果款牛太好味啦,所以我地再追加左一碟!真係食過翻尋味~~~

食飽之後,我地買埋甜品就返酒店休息,準備第二朝去行宮川朝市啦~

Day 9: 2010/04/05 山梨、下呂

Day 9: 4/05 (Sat) : 雨

新宿  山梨果園  下呂

早餐:道の駅 -三文治
午餐:-
晚餐:下呂-くつろぎの宿 神明山荘之一泊二食

住:下呂-くつろぎの宿 神明山荘

係新宿 hea 左 2 日之後,我地就要繼續另一半行程啦,今日我地亦都要接另一位團員「小花」o既加入,佢係搭 ANA o既凌晨機黎,所以約朝早 6 點就會到羽田機場,之前教左佢搭機場巴士黎新宿,咁我地去巴士站度接佢,另外,都叫左佢上巴士之後 call 我地,咁容易預時間,所以今朝天未光我地就要起身準備啦。

大約 7 :40am ,小花就已經到左新宿,但係今朝因為落大雨,而我地 2 個又冇遮,係條街度搵左陣先搵到佢個巴士站,所以都幾狼狽。跟住我地就返酒店拎埋我地o既行李,未到 8 點就準備好 check-out 啦,我地係酒店對面o既 Toyota Rent-a-Car 度拎車,之後就向下半o既的行程進發。

今天我地需要渣車o既路段都比較長,由新宿去到下呂,大約要 6 個半鐘車,所以我地今日只有一個行程,就係去山梨縣摘士多啤梨,呢個活動,日本人叫做「いちご狩り」,由新宿去山梨大約要 2 個鐘,跟住再加 4 個半鐘就會去到下呂啦。

我地由東京出發,因為大家都冇食早餐,所以係上左高速公路之後,就係第一個道の駅食早餐啦,不過我地都唔係好想食野,所以只係揀左買外賣(熱狗、三文治、飲品等)上車食,就直驅山梨 lu。

今日天氣好差,大雨由朝開始都未停過,好彩今日主要都係渣車啫,冇特別景點要去。很快我地就去到目的地啦,原來我地之前 book 左o既飯島フルーツファーム士多啤梨園,是一排建築係方圓百里都冇其他野o既小山丘上o既溫室!

好快咁係門口比左錢,拎左張飛,我地就即刻去 #6 號溫室度啦。

係溫室入面,我地搵到主持人,佢已經一早預留左一直行整排兩邊o既士多啤梨果樹比我地,仲 mark 低左我個名添~嘻嘻,我地應該係今日最早黎o既客人呢~

預留左比我地採摘o既士多啤梨真係超甜又超好味,而且當然係非常新鮮啦~雖然園主有提供煉奶比我地,但係其實係唔駛用煉奶已經好甜o家啦~

係呢度要比其他 blogger 一個忠告,如果你好鍾意食香港賣o既士多啤梨,而又唔捨得返到香港之後唔再吃,就千期唔好嘗試「いちご狩り」:因為你一定會後悔,係香港點樣都搵唔到可以媲美日本「いちご狩り」o既士多啤梨!(註:呢個係我地第二次係日本いちご狩り,上一次之後,我地已經好少好少係香港食士多啤梨 lu~因為真係冇得比!)

成個いちご狩り有 30 分鐘o既時間,不過我地不停食,係大約 20  分鐘就已經食士多啤梨食到飽晒啦。

最後我地食左幾多?!去片~~~

我地最後係總共食左人地超過 150 粒!實在係好強!食飽之後,同園主傾左陣偈,佢仲送左包士多啤梨餅比我地添!

跟住,由於太飽,大家決定唔食午餐,就直接以由士多啤梨園出發去下呂溫泉方向o既酒店 lu。

下呂溫泉,係五百幾年前已經同有馬溫泉、草津溫泉齊名,係日本三大名泉之一。佢位於岐阜縣同長野縣交界,飛驒群山環抱之中,有條沿住飛彈川而建o既溫泉街。相傳係千幾年之前,曾經有隻腳部受左傷o既白鷺黎到呢度泡湯療傷,因此下呂溫泉就被人所發現,所以下呂好多o既手信,都係以白鷺黎做標誌o既。

因為冇停低食午餐,所以我地比原定o既時間早就到酒店,呢個時候,開始冇咁大雨,不過可能因為我地今日要早起,而小花係機上又冇訓過,所以我地就係酒店房入面 hea 到食飯啦~

應該係平日o既關係,酒店唔係好多客人,而我地今晚食飯o既地方,竟然大得有點過份!有幾大?!我地數過,有成 30 個疊~一開門入去餐廳果時,真係比佢嚇親~我地張枱就係個廳中間~真係好誇張!

睇睇個餐牌,今晚好似好多野食咁,冇食 lunch ,真係o岩晒!

先黎個餐酒,我地覺得 ok ,不過小花話好似葯水味喎!

晚餐係一貫o既豐富,除左下面 d 相之後,仲有刺身呀、炸物呀、飯呀、甜品呀等等,我就唔 post 上黎啦~今次只係 post d 比較特別o既食品~

呢個前菜,支竹籤上面o既蝴蝶同櫻花都可以食得o既!甜甜地,幾得意的~

跟住有呢個綠色o既奇怪湯,不過小花同 Gary 都話幾好飲。。。我就。。。麻麻地~

跟住有個小和牛~好味!

 

仲有粒鮑魚仔,同埋味噌燒魚添~

 

食飽飯,我地就各自去沖涼,之後好早就訓覺 lu ~

 

Day 8: 2010/04/04 新宿

Day 8: 4/04 (Sun) : 雨

新宿

早/午餐:Times Square -築地玉壽司
晚餐:新宿-かに道樂

住:新宿-ホテルサンルートプラザ新宿

經過尋晚係上野公園睇左滿開o既櫻花之後,諗住今朝行過去新宿御苑賞櫻,希望朝早會冇咁多人,可以影下相咁啦。黎過新宿咁多次,我地都未去過新宿御苑,睇地圖就話由酒店去要行約 20 分鐘左右,點知行左好耐,都搵唔到新宿御苑o既入口。。。而個天又開始落雨,所以行左約半個鐘之後,我地就行返酒店放低 d 相機野,諗住係新宿周圍 Shopping 啦。

我地先係 Franc Franc 度睇中左個電子座枱鐘,佢有微波接收,可以 Sync 返個時間,而且又有溫度同濕度顯示,不過唔知香港用唔用得呢?之後,我地就行左去 Time Square 側邊o既紀伊國屋書店,Gary 就睇中左幾本棋書,諗住係呢個 Trip 走之前先買,無謂依家買左拎住搬餐死啦~而我就睇左幾本煮野食o既書,不過就未諗買唔買好~

之後就差唔多 12 點啦,因為朝早冇食早餐,開始肚餓,咁就唯有上 Time Square 望下有咩野食,竟然見到築地玉壽司唔駛等位喎,咁就入左去食啦~之前幾次都勁多人,要等起碼 1 粒鐘先有位,咁緊係唔等啦~佢有散叫、套餐同埋放題,不過既然我地冇食早餐,咁緊係揀放題啦,何況佢又冇時間限制喎!

我地慢慢食之下,最後食左 48 件!勁飽~不過佢 d 壽司真係好好味,好新鮮~睇下我地食左 d 咩:

食飽之後,當然繼續行街啦,係 Agnes b 睇中左個紫色袋,又係 Bic Camera 睇中左一個新出o既野球 Game 、 Leica  M3 Minox 復刻版相機、Nikon D5000 相機等等,亦都搵到今個 trip 想買o既生ゴミ垃處理機,最後因為都係唔習慣用小相機影相,所以我就買左 Nikon D5000 相機同一支定焦鏡比跟住個 trip 用~今日真係名副其實係 shopping day !至於其他野,你地估下最後我邊 d 有買,邊 d 冇買~

是晚,我地約左 Gary 舊同事同佢女友係新宿食飯,因為佢地都咁o岩黎日本睇櫻花,而佢地係今晚落機,我地又咁o岩係新宿,所以就約左一齊去食蟹啦~一路食飯一路傾偈,話咁快就成 10 點幾啦,咁我地就各自返酒店,要係香港再見 lu ~

Day 7: 2010/04/03 新宿

Day 7: 4/3 (Sat) : 晴

湯の山  名古屋  新宿

早餐:三峯園之一泊二食
午餐:車站便當
晚餐:小田急超市特賣場

住:新宿-ホテルサンルートプラザ新宿

今日我地就要離開三重啦,一早係酒店食完早餐,就要渣車返名古屋,係 10:30am 到Mazda 還車,跟住趕 10:55am o既新幹線-こだま號返上東京了。

由湯の山返名古屋大約要 1 個鐘車程,不過為左唔好遲到搭唔到新幹線,所以我地預左 2 個鐘,咁 8:30am 左右就已經係酒店走啦,今次有個職員幫我地拎一個行李箱,都算係咁啦~另外,時間安排同埋交通都幾順利,所以我地約 10:00am 就到左名古屋站,係站口放低左行李,我就自己渣架車去還啦,攪掂晒再入埋站都係 10:20am 左右咋,由於車程都比較長,我地係站頭買左兩個車站便當做 lunch ,另外都換左車票附送o既飲品,就順利咁上左新幹線,向下一半o既旅程進發。

點知個車站便當相當難食,而且份量都幾大,早知淨買一個啦,尤其係佢都唔平!下次我應該唔會再買呢類款式啦~

今日天氣晴朗,我地係返東京o既途中,竟然見到春天o既富士山遠景,即時拎部相機出黎影返幾張相先~見唔見到佢,真係好睇彩數,因為富士山成日比 d 雲遮住o家~

係 1 點幾,我地就係品川落車,點知因為我地果張平車票,原來係要係品川出閘,之後再買車飛先可以搭山手線外回去新宿,雖然總價錢都係好平,但係就變左比較麻煩囉~因為要去搵果個票機!

今次我地都係住ホテルサンルートプラザ新宿,因為貪佢近站口,而且後日拎車就係對面街口,雖然房租貴,但係超近同超方便!

我地先到酒店放好行李,就搭車去上野恩賜公園賞櫻。今次旅程其實係好幸運,因為尋晚係電視新聞到知道 4 月 2 日o的東京突然有一股溫暖海洋性氣流,加上先前o既冷峰,組成左一股強大的風圈,佢o既強度同颱風差唔多,超過100km/h !!而由於這股和暖氣流o既突襲,東京o既櫻花突然全部滿開了!而且強風亦令東京o既交通陷入大混亂一陣!好彩今日所有混亂已經回復正常,而櫻花亦趕及全開啦~

不過,賞櫻o既人群實在太多,幾乎可以同香港年卅晚o既香港維園年宵市場相提並論。所以。。。櫻花照?!唔駛提啦。。。黎呢度算係感受一下日本人賞櫻o既熱鬧;而當中也少不了哄動o既場面:在我地準備離開公園果時,突然刮來一陣陣怪風,令我地可以見到非常聞名o既壯麗景色-「櫻吹雪」。每當花瓣隨風吹落o既時候,一股股o既花海吹過,伴隨住一陣陣日本人不絕o既歡呼聲:「すごいぃぃぃぃ~~~~」、「ええぇぇぇぇぇぇ~~~~~~~~」,總算不枉今次o既旅行啦~

睇完櫻花之後,我地就返酒店放好野,跟住去搵野食,不過因為今日係星期六,間間食市都超多人,最後我地就係超市買左一堆外賣返酒店食當晚餐啦~有:漢堡扒、三文治、蟹飯、牛奶、可樂,甜品就有香蕉 pancake~ 2 個人食到勁飽!