December 2017
S M T W T F S
« Nov    
 12
3456789
10111213141516
17181920212223
24252627282930
31  

Day 18: 2010/04/14 新宿、香港

Day 18: 4/14 (Tue) : 陰

新宿  成田空港  香港

早餐:新宿-Starbucks
午餐:新宿-かに道楽
晚餐:飛機餐

今晚我地就返香港 lu,好彩預係新宿都係行街街咋,因為呢 2 日都係陰天、落雨既!

今朝我地約 10 點半起身後,就最後衝刺啦~我地先去左 Starbucks 食早餐,之後就又開始行街,不過朝早冇咩收穫,Gary 係 BicCamera 睇中左個小相機,但係佢冇貨喎~

咁我地就諗住搵間好野,食餐好既 lunch ,終於又決定左かに道楽,係かに道楽附近既 Yodobashi 竟然見到果部相機,仲要平幾千 yen 添,咪諗住食完飯落黎買,點知佢今日上菜好慢,一食就食左差唔多兩個幾鐘,攪到成 2 點幾走,咁即刻落去買機啦,個店員又攪左好鬼耐。

我地一早已經買左 3:00pm 係酒店門口出發既機場巴士飛,咁超碼要 2:45pm 返到酒店,係 lobby 拎返 d 行李,再去巴士站。咁我地買完野之後就好趕咁狂奔返酒店(本來要約 20-25 mins),但係離開果時已經係 2:35pm 啦!我又跑得唔快喎,所以最後決定 Gary 同小花跑快 d 去 lobby 拎野,而我就先去巴士站~我去到巴士站,已經係 2:45pm 左右,有一堆人排緊隊,過左唔夠 2 分鐘就見巴士到左,好彩因為大家都好多行李呀、袋呀咁,所以上車速度都比較慢,而我就好心急咁等佢地,最後佢地大約 2:50pm 都拎返寄存既行李落黎,原來好多人搭 lift,所以等左好耐,而我地都安全咁上巴士 lu~

可能今日係平日既下晝,又未到放工時間,成程都好順暢,本來要 2 小時既車程,約 90 分鐘就到機場啦,仲早左好多到機場添,早知可以買下一班巴士,咁就唔駛咁趕啦~

至於我地點怒買法,睇下戰利品就清楚囉~哈~(d 相係尋晚係酒店執喼既時候影既,今日買果 d 野係冇影到囉~)

 

Day 17: 2010/04/13 新宿

Day 17: 4/13 (Mon) : 陰

新宿

早餐:-
午餐:新宿-築地玉壽司
晚餐:新宿-酒店中餐廳

住:新宿-新宿ワシントンホテル

返到黎新宿我地就開始慢慢 hea 同 shop 啦,所以成 9 點幾 10 點先起身,今日既第一站係去 Times Square 果邊,我地要買之前睇中既電子鐘同書,而小花就繼續睇 Porter 野。

 

跟住睇到十一點幾,因為冇食早餐,我地就去食 early lunch 啦,大家竟然想再去挑戰玉壽司既放題,咁我地就上去左食啦~今次叫左勁多野,超多海膽壽司啦,最後我地 3 個人係食左最少 84 件,再加 4 個手卷既!而冠軍就係 Gary 啦~

 

 

 

 

食飽飽我地就周圍行,去左 100 yen 店啦、夾公仔舖啦、大百貨公司啦等等,總之就買左成日啦~

 

之後,當然返酒店啦,之後大家又唔想行太遠去食飯,所以就揀左酒店內餐廳度食啦,咁食左十幾日日式野,就揀左中餐做今晚既 dinner 啦,我地揀左片皮鴨餐,最攪笑既係,係會有個待應生幫你包果個片皮鴨既,見佢用筷子同叉攪左超耐囉~

 

 

 

 

Day 16: 2010/04/12 軽井沢、新宿

Day 16: 4/12 (Sun) : 雨

軽井沢  新宿

早餐:軽井沢-ル・モンヴェール之一泊二食
午餐:道之駅
晚餐:新宿-かに道楽

住:新宿-新宿ワシントンホテル

今朝起身,就見到個天仍然係超黑,仲落緊雨,本來要去睇教堂呀、踏青呀等等既行程就只好取消 lu~所以我地就係 Pension 度慢慢嘆早餐啦,新鮮出爐既麵包真係超好味,我同小花都食左起碼兩個包~

 

因為尋日 outlet 我地只係行左一半,所以就諗住再過去 Shop 啦!都話係「怒買」啦~哈哈哈~唔好問我有冇買野,我只可以話。。我地由一朝早 10:00am 開門,行到中午囉~

本來今日夜晚先係新宿還車,不過因為怕 23 區內塞車,同埋今次我地卜左新宿ワシントンホテル,所以行完街大家都覺得寧願早少少起程返去好過~因為諗住係新宿ワシントンホテル停車場泊好車,搬好左行李之後先去還車呢~

一出 highway,就去到一個超大既道之駅,除左有小餐廳之外,仲有 Starbucks 添!我今日叫左個正常既,係牛肉烏冬定食,小花就叫左咖哩吉列豬扒飯,而 Gary 就叫左個軽井沢限定石頭定食。

 

點知搵間酒店攪左超耐,雖然知道佢大約位置係邊,但係兜黎兜去都搵唔到停車場個入口!最後攪呢樣攪果樣,還埋車都成 4 點啦~之後我地就係新宿駅附近行左陣街,6 點幾 7 點就諗住去食飯啦,本來我地諗住去食和牛 Shabubu,點知唔記得個地址,係落緊雨之下,我地係新宿搵左陣都搵唔到,就去左かに道楽食飯 lu~

 

 

呢一餐我地等左陣位,又食左超耐,走果時都成 9 點啦,咁食飽飯就緊係返酒店休息,第二日再 shop 過啦!哈哈~

Day 15: 2010/04/11 軽井沢

Day 15: 4/11 (Sun) : 陰、霧、雨

金沢  軽井沢

早餐:道之駅
午餐:軽井沢-プリンスショッピングプラザ:蛋包飯
晚餐:軽井沢-ル・モンヴェール之一泊二食

住:軽井沢-ル・モンヴェール (Le Mont Vert)

我地今日就離開金沢啦,其實今次個天氣對我地真係幾唔錯啦,點解?!因為尋日有太陽之下去左影相,而今日就係非常天陰、有霧,而我地去到軽井沢仲落大雨添!另外,由今日開始,就係我地呢個 trip 既尾聲啦,不過亦都係我地呢個「怒食、怒買」之旅既開始!

我地係酒店 check-out 之後,早餐都未食,就直去軽井沢啦,咁我地都係諗住係途中既道之駅食早餐既。我地就食左個頗豐富既早餐,我仲發現佢有豬肚烏冬呢款估唔到會係日本出現既野食,小花就叫左個白咖哩飯,而 Gary 仍然係好穩陣咁叫左親子丼既~

 

係由金沢經過富山既山路中,就已經開始大霧同落雨,大霧到係連前面架車既燈都見唔到!所以全部車都渣得好慢(雖然都有成 40km/hr),仲不停打晒死火燈添~真係渣左咁多年車,都未試過咁大霧囉!

 

(點大霧法既 Video 係遲少少後補)

所以係慢慢渣車之下,我地係去到午餐時間先到軽井沢既,由於落緊毛毛細雨,咁我地就決定先去プリンスショッピングプラザ度望下,同埋食 lunch。プリンスショッピングプラザ係一個好大既 outlet ,個停車場都超大,我地去到果時已經有好多人係度啦,而 outlet 既旁邊有好多間餐廳,真係乜都有,好似:中餐、西餐、日式、韓式等等,咁我地就揀左去食日式蛋包飯。今次我揀左咖哩牛腩蛋包飯,小花就咖哩海鮮,而 Gary 就係普通蛋包飯既。

 

 

因為個 outlet 真係超大,中間仲有個大既人造湖,所以食緊飯果時我地就開始研究行邊幾間舖頭,咁食完飯就開始係行,諗住行一陣,睇下個天氣點先再算,點知。。。一行之下,就行到成 4 點幾 5 點(雖然冇停雨),當然大家都係滿載而歸啦!

 

咁我見都成 4 點幾啦,就提議不如早少少去今晚既 Pension(ル・モンヴェール),因為聽日返新宿就要還車啦,我地沿路買左咁多手信,都係時候要執下個喼啦!

ル・モンヴェール都算係プリンスショッピングプラザ附近,渣 10 分鐘車左右,我地今次係卜左三人房既,有三張單人床,間房既面積都算幾大下,仲有私人廁所,咁我地係 Pension 度 hea 左陣、影下相、睇下雜誌咁就到晚餐時間 lu~

 

 

 

今日既晚餐係 pension 既西式晚餐,係開餐之前,個 relax 既氣氛真係好好,屋主開住 d 好柔和既鋼琴音樂黎做 background,晚餐既份量唔算好多,但係幾好味,個甜品仲有驚喜添~

 

 

食飽飯,我地就返房好努力咁封喼,先發現原來我地真係買左好多野呀!!!

Day 14: 2010/04/10 金沢

Day 14: 4/10 (Sat) : 晴

金沢

早餐:金沢-金沢駅前 Starbucks
午餐:兼六園附近-曲水宴
晚餐:金沢-酉笑

住:金沢-金沢マンテンホテル駅前

今日我地仍然係金沢,因為我地會係度留兩日既,而今日我地有個特別節目,就係加賀友禅試著,之後係兼六園度影相啦~

去左日本咁多次,都未真正咁試著過和服,所以今次黎到金沢,我就話點都要試一次啦。係金沢,比較出名既和服染布法係叫做加賀友禅,係由 500 多年前加賀國傳入既。係網上,我搵到兩間舖頭,最後就揀左加賀友禅伝統産業会館,雖然佢係比較貴既一間,但係睇佢個網頁,d 衫好似比較靚,而且係佢兼六園附近(步行可到),而我地今日 plan 左搭巴士,所以就揀佢啦!(要試著加賀友禅,記得先係網上預約~)

因為酒店冇包早餐,所以起身後我地就行去金沢駅前買左一日劵,搭市內巴士出發去兼六園啦。點知去到巴士站,岩岩開左班車,咁我地就行左去 Starbucks 食個早餐啦。

  

 

食飽我地就上車啦,今日天氣好好,有陽光,最適宜係影相。係巴士未到兼六園既時候,突然見到有個站附近有好靚既櫻花,大家即刻話落車影幾張相先~

  

  

 

  

係河邊影左一大餐之後,我地又再跳上巴士,趕去兼六園啦,因為掛住影相,去到兼六園已經過左預約時間!好快咁搵到加賀友禅伝統産業会館之後,我同小花就揀衫同著衫啦~嘩,套衫非常多層!攪掂著晒上身都用左成 45 分鐘~當然有職員幫手啦,如果唔係,真係唔知點攪呀~我地由出發開始,租左 3 個鐘衫,應該點都夠啦~

之後,我地就行去兼六園啦,未入到園,兩邊路旁既櫻花已經滿開,而只見街道上人山人海,超多人去賞櫻喎,好彩我地冇渣車,因為停車場門口勁多車等緊位,而且都有其他著住和服既女仔同我地一樣,去果度影相~

  

 

  

行下、影下,話咁快就過左兩個半鐘啦,咁我地就先去還衫,係途中,我地仲試左金沢出名既金箔軟雪糕,之後就係附近食 lunch 啦。不過因為 Gary 話唔係好想食飯,所以佢只係叫左野飲同雪糕做 lunch ,我同小花就緊係叫左定食啦~

  

 

食飽飽,我地就行左去廿一世紀美術館,點知比人搵炳,比左入場費入去,點知冇野睇?!唔知係我地冇美術天份呀,定係點,係入面行黎行去,睇黎睇去,都唔明有咩野睇。。。所以係最出名既泳池底影左相,就走人啦。

 

之後,我地又搭巴士去東茶屋街(ひがし茶屋街),可能因為去到比較晏啦,所以成條街 9 成既舖頭都已經閂門啦。不過,睇落都似係賣紀念品既地方,所以行左陣我地就走 lu。

 

跟住,我地就搭車返金沢站,係車站商場搵左間洋式餐廳食晚飯,就返酒店休息,準備聽日離開金沢 lu~

 

 

 

Day 13: 2010/04/09 白川郷、金沢

Day 13: 4/9 (Fri) : 晴

平湯  白川鄉  金沢

早餐:平湯-匠の宿 深山桜庵之一泊二食
午餐:道之駅-雪糕、小食
晚餐:金沢-近江町市場-ひら丼

住:金沢-金沢マンテンホテル駅前

今朝我一早就起左身,去左酒店個公共風呂度浸,佢浸完有野飲拎,今日係益力多!我地就係食早餐前拎左人地四支益力多同埋一支橙奶飲係早餐時飲!今日個早餐都係燒烤,仲好豐富添,差 d 飽到食唔晒,之後仲有咖啡飲!

 

 

 

 

今日我地終於去旅程另一個主要景點,就係白川郷啦。佢位於岐阜縣既西北部,係一條四面環山、又有河川流過既小鄉村。呢度最特別既係【合掌造】(由茅草做成人字形既屋頂)既小屋仔,佢係 1995 年被指定爲聯合國教科文組織的世界文化遺産。之前上網睇介紹,其實我覺得白川郷最靚既時間應該係冬天,白雪茫茫一遍,果 d 合掌屋仔全部變成白色真係好靚~不過今次橫掂會去金沢,都叫做順路,所以都去一探呢個地方。只可惜,黎到發現遊人非常多!可以話變左一個遊客區,我估係夜晚,店鋪閂門之後先可以見到佢寧靜既一面啦。

 

 

  

係白川郷行左陣,係遠處既展望台影完相,大家又決定唔入屋參觀,就返去拎車直接去金沢啦,行行下,見到有 d 屋仔門口既裝飾品竟然係好熟識既卡通人物,因為唔係太餓,我地買左係高山度小花好想食既牛肉饅頭黎試,不過食落又一般咋喎~另外又試左布甸,睇黎今日都係唔駛食 lunch 啦~哈!

 

 

 

離開白川郷之後,我地就向金沢進發,佢係日本石川県既第一大城市,由於冇食飯既關係,我地係途中既道之駅買左雪糕同小食當午餐。本來我地個 plan 係去近江町市場食午餐,跟住去廿一世紀美術館既,不過我地離開白川郷已經過左食飯時間,所以去到近江町市場果時已經成 4 點幾 5 點,d 舖頭都開始閂門,不過價錢就真係幾抵,仲見到當造既大筍!

 

咁我地係市場度行左個圈,買左少少生果,就係市場入面搵左間餐廳,食左個 early dinner 啦。呢度由於係市場同近海既關係,主打都係魚生,我同小花各人叫左一個刺身盛合,而 Gary 就叫左個海膽井,個盛合超大兜,我食左大半已經食唔晒啦,剩返果 d 當然係 Gary 食埋啦~

 

 

跟住,我地就返酒店啦,大城市即係大城市,我地係市場走果時,見街道已經開始有少少塞車!所以我都都係諗住返酒店 settle down 之後再算,係酒店 check-in 後,大家都唔想周圍去,所以最後我同小花行左去金沢站既商場逛,然後去左麥當當買左少少野當宵夜就返酒店休息啦~