December 2017
S M T W T F S
« Nov    
 12
3456789
10111213141516
17181920212223
24252627282930
31  

Day 11: 2008/11/2 新宿

Day 11: 11/2 (Sun) 陰

新宿  香港

午餐:新宿-蟹道樂
晚餐:飛機餐

今朝一早 5 點幾我地就去左機場接細姨,返黎酒店之後就幫佢 check-in 左,同埋等佢休息下,我地講左陣野之後,佢就係酒店上網,我地就繼續訓多陣。

起身之後,細姨就叫同我地講,我個電話有 SMS 黎,咁我一睇,原來話我地原身班機 cancelled 左!我心諗,唔係呀嘛,駛唔駛咁黑仔呀?!不過,咁咪可以係日本玩多日囉!之後就上網 check 啦,跟住就收到電話,航空公司打黎,話我地下晝班機 cancelled 左,不過改左另一班比我地上機(比之前一班晏 1 個幾鐘),咁都好 d ,即係可以即日返香港。

之後我地就一齊出去左食 lunch ,因為細姨之前一晚冇好野食,我地就又去左蟹道樂啦,佢 d lunch set ,真係平 dinner 好多,食飽之後就係新宿行左陣,買左少少野咁啦~

咁遊記部份差唔多到此為止,因為今日都冇咩野做過,而下晝我地 2 個就搭機場巴士去成田,返香港 lu~去到機場,我地 2 個,竟然由 business class upgrade 左上 first class !實在太勁啦!係唔駛錢o既情況之下,去程坐商務,回程坐頭等!係頭等個 dinner ,仲有得揀,要懷石料理定西餐添!咁我就揀左食懷石啦,佢有前菜、刺身、主菜、湯等等,最後仲有個生果,因為個生果太好味啦,我食完之後仲叫多左一個添!

 

 

至於細姨,就會係呢度留幾日,而我都搵好左去邊度申請 passport 、點搭車,不過呢兩日日本都係假期,所以要到假期完先可以去申請啦~

Day 10: 2008/11/1 那須、新宿

Day 10: 11/1 (Sat) 陰

那須  新宿

早餐:那須-アジアに憩う寛ぎの館 合歓林(ねむりん)オリエンタル之一泊二食
午餐:???
晚餐:新宿-吉野家

住:新宿-ホテルサンルートプラザ新宿
訂房方法:經 Jalan 網上預訂

由於其他四個人買o既係 7 日票,所以佢地今晚就會返香港啦~而我同 gary 就會係新宿留多晚,聽日夜晚先上機。

今日淨係得一個行程,就係朝早去那須どうぷつ王國啦,我地因為怕下晝會塞車,所以今朝未食早餐就已經執好行李,食完早餐就走人啦。網上有 500 yen 割引 coupon 可以用,不過之前要係 Nasu Garden Outlet 蓋印o既,咁我地本來諗住尋日去印,點知,個 counter 冇開!正當我地係門口要比錢買飛o既時候,我阿媽竟然睇到 poster ,話好似老人家(over 60 歲)同埋小朋友今日入場都 free 喎,叫我去問下,問完之後,真係做緊 promotion,所以我地只係比左 4 個大人錢。

個動物王國面積都幾大,有 d 地方仲要搭王國o既 shuttle bus 過去,而且佢有分室內同室外,亦都有室內同室外o既表演睇。我地睇左戶外o既飛禽表演,又睇左室內o既小動物表演,仲睇左好多動物,如:蝙蝠、企鵝、羊、雀等等,再行左圈,就回程啦。

 

   

 

 

名:那須どうぷつ王國 (Nasu Animal Kingdom)
址:329-3223 栃木県那須郡那須町大字大島 1042-1
營:9:00am ~ 5:00pm
電:0287-77-1110
費:1,800 yen

因為佢地會係羽田搭 8:45pm 機走,我地預最遲要 6:00pm 去到機場,而由那須去羽田又要 2 個幾鐘,所以我地係那須どうぷつ王國行到差唔多中午就走啦,因為大家都唔係好肚餓,咁我地只係渣車途中,經過o既一間食店食 lunch ,之後就繼續出發。

跟住,渣車經過一個本地人o既街市,睇落類似我地 d 蔬菜批發市場咁o既,我阿媽一見到,就話要落車睇啦。呢個市場主要賣生果,而且係一箱箱咁賣,價錢仲好平,成箱十幾個o既青森蘋果,係大約 1600-2000 yen 左右,富貴柿都係 1000 yen 左右,咁我阿媽、細姨同表姐 3 個人就好興奮咁買左 4 箱野返黎,係架車度研究點樣拎返香港。

到左羽田機場,已經係大約 6pm,咁放低左佢地四個,我就渣車返新宿還車啦,點知因為新宿勁塞車,本來約 45 分鐘o既車程,渣左 2 個幾鐘先去到新宿,成條橋都係車,攪到成 9:30pm 先到!我地先到酒店放低行李,Gary 睇住 d 行李,我就渣架車去還,好彩由還車果度行返去酒店都係 2 個街口,之後攪埋 check-in 呀已經成 10pm~

 

係房放好行李之後,因為太攰啦,就去左街口o既吉野家買外賣返酒店食,跟住再返到酒店已經係 11 點幾~收拾左陣行李,準備好聽日要還返比 ANA o既電話,係酒店上左陣網,到 12 點幾就訓覺 lu~

不過拎個電話出黎果時,見到有成十幾個 miss calls !因為渣車果時將個電話放左係大褸度,而大褸又放左係車尾箱,所以唔知佢響過,見到 d miss calls 係 7 點幾 8 點打黎,諗住佢地可能上機前有野搵我地,不過依家都上左機,咁都應該冇咩特別野呀,所以就冇理到啦。點知,訓訓下到左 1 點幾,我個香港電話就響,我望下個來電,係我老豆香港電話,由於訓緊覺比人嘈醒o既關係,我心入面先諗緊「到左香港都唔駛專登打電話話我知o家」,點知打電話o既人係表姐,佢仲要話「細姨本 passport 同 d 錢都唔見左!留左係機場返唔到黎!身上面仲冇乜現金錢剩!」仲話上機前打左好多次電話比我(ANA 果個),冇人聽,打香港電話,又打唔通咁。聽到之後,我當堂成個彈左起身,心諗,唔係呀嘛,咁依家係邊?!

之後,表姐就話,細姨個電話冇電,所以留左佢個電話比佢用,叫我打比佢睇下點。跟住我就起左身,亦都叫醒左 Gary ,話左佢知呢件事。咁我就打電話比細姨,終於就聯絡到啦~咁佢都安全,不過係羽田果度冇得出黎,有機場職員係果度,而且除左佢之外,都仲有一兩個人都係滯留左係機場,亦都有水機呀、野食咁。跟住,我就幫佢上網 book 酒店,同埋 check 左最早幾點有車去羽田,諗住去接佢返先再睇點攪啦,同埋上網研究點係日本拎 passport ~攪完咁多野已經成 4 點,之後我地再訓多左陣,就出發去接佢啦,好彩我地本身係留多一日咋!

Day 9: 2008/10/31 那須

Day 9: 10/31 (Fri) 陰

仙台  那須(Nasu)

早餐:仙台-リッチモンドホテル仙台早餐
午餐:那須-那須ガーデンアウトレット
晚餐:那須-アジアに憩う寛ぎの館 合歓林(ねむりん)オリエンタル之一泊二食

住:那須-アジアに憩う寛ぎの館 合歓林(ねむりん)オリエンタル
訂房方法:經 Jalan 網上預訂

今日o既行程,同之前 plan o既好唔同,因為之前係諗住《仙台  會津若松 (Aizuwakomatu)  那須(Nasu)》o既,但係可能玩左咁多日大家有 d 攰啦,所以就 skipped 左去會津,直接落那須,會津若松、鶴ヶ城、五色沼、豬苖代湖等地就比我地放棄左啦~

由仙台去那須都要成 3 個幾鐘,我地改左行程之後,就只係去一個地方,就係新開o既那須ガーデンアウトレット(Nasu Garden Outlet)啦~即係今日淨係黎 shopping !由於出發前我已經同各家人講,冇乜機會行街 shopping o既,所以咁多日大家都冇乜買過野,即使係去大城市好似盛岡、仙台咁都冇行過街,所以最尾就安排左呢個去 outlet o既行程啦~可能係由於呢個 outlet 係新開o既關係,係 GPS 度用電話號碼係搵唔到o既!咁我地就唯有依佢指示,用那須大學去 search ,之後去到附近再睇路牌同埋之前 print 左o既地圖啦~咁當然最後都係搵到啦!到左 outlet ,我地先一齊食 lunch ,跟住就各自去行街買野啦,除左我阿媽同老豆之外,全部人都有收穫呢!

名:那須ガーデンアウトレット
址:栃木県那須塩原市(旧黒磯市)塩野崎184-7 (カーナビによっては黒磯市(旧市名)でのご案内になります)
周辺施設:宇都宮共和大学 那須キャンパス(旧那須大学)で検索お願いいたします。
營:10:00am ~ 7:00pm
電:0287-65-4999

行到 4 點幾 5 點左右,我地就出發去今晚o既酒店,事實上,我唔應該用「酒店」形容佢,因為我地今晚係住 Cottage !我地 book 左一間 8 人用o既 Cottage,分兩層o既,有 3 間和室睡房,樓下就有廳、廚房、廁所等等。而旅館本身除左有唔同 cottages 之外,仲有新館同本館(齋房),亦都有 4 個貸切風呂,24 小時開放,要用就去櫃枱預約,免費o既。今日o既晚餐係 90 分鐘o既放題,有豬、牛、蟹、沙律、蔬菜、飲品等等,全旅館所有人一齊食,由 6:00pm 開始,所以我地都預早 d ,大約 5 點幾要去到。

我地準時係 6 點前去到餐廳,野食已經全部預備好晒,最特別o既係佢有成幾十種唔同o既飲品(包括酒類)比你,等你可以自己溝野飲,咁我當然唔執輸啦,去溝左一杯自以為日本 soar 味o既飲品,點知大家試過,話勁好味喎~跟住就個個都跟我去溝啦~至於佢個放題,真係好好味,而且我係外加左 1000 yen,每人可以任食蟹腳同牛扒o既,後尾真係飽到乜都食唔落!(註:我老豆同阿媽後尾話,全程最好食就係今晚添!)

食飽之後,大家就返 cottage 收拾今日o既戰利品,之後就去浸埋全程最後一次o既溫泉,因為聽日就差唔多係旅程最後一日啦~

名稱:アジアに憩う寛ぎの館 合歓林(ねむりん)オリエンタル
址:325-0303 那須町高久乙 3375
In/Out:3:00pm / 10:00am
電:0287-78-2160

Day 8: 2008/10/30 松島、仙台

Day 8: 10/30 (Thu) 陰

乳頭溫泉  松島(Matsushima)  仙台 (Sendai)

早餐:乳頭溫泉-鶴の湯別館山の宿 之一泊二食
午餐:松島-???
晚餐:仙台-???

住:仙台-リッチモンドホテル仙台
訂房方法:經 Jalan 網上預訂

今朝我好早就起左身,因為未到食早餐o既時間,我就一個人自己走左去鶴の湯別館山の宿入面個貸切風呂啦~由我地房行 5 分鐘左右就到,佢係分開男女o既,而且係 free 的,不過就要睇你好唔好彩,如果有人用緊,咁你就冇得浸啦~咁好好彩,我去到果時冇人,今次我仲偷偷拎埋小相機,順便影左幾張相添~一早浸一浸,當堂成個人精神晒~

   

   

浸完就去左食早餐,之後我地就離開乳頭溫泉啦!我同自己講,有機會真係要再黎多次,係呢個冇電視、冇現代物品o既深山中,真係可以令人心廣神怡,可以忘卻一切世間o既煩惱~

跟住,我地就繼續南下,向宮城縣松島出發。松島係由散落係松島海岸大大小小約 250 個小島組成,亦都係「日本三大美景」(松島、宮島、天橋立)之一,黎到呢度,除左可以乘搭遊覽船出海睇各個形狀不同o既島嶼,睇海鷗之外;因為佢o既位置近海,所以各式魚生同蠔都係好美味o既~

今次車程都要成 3 個幾鐘,所以去到松島o既時候,已經係中午啦~所以就即時去搵野食啦,本來係諗住係松島センチュリーホテルお食事処「松島」食午餐,不過大家話想係普通餐廳食,所以我地停好車之後,就周圍搵野食啦。今次我地揀左係海邊o既一間小餐館,各人叫左一個定食,另外就叫左唔同醬汁o既生蠔,因為松島最出名就係生蠔,點可以唔食呢!個人覺得魚生就冇北海道咁好味,但係生蠔真係超正!

名:松島センチュリーホテル
址:宮城縣宮城郡松島町松島字仙随 8
電:022-354-4111

食完飯之後,我地就搭 2:00pm 開出o既遊覽船出海,全程約 50 分鐘,之前已在網上訂位,一人 1,400 yen,網上亦都有 Coupon 可以印出黎,咁就一人 1,260 yen ok 啦;另外,遊覽船二樓係頭等位,要另外比附加費 600 yen,係船入面買飛就得啦。係船度,有廣播介紹松島唔同o既小島,咁當然係講日文啦,不過我就同 Gary 都好攰,竟然係船上訓左個覺!至於其他人,就出左甲板餵海鷗,仲話好好玩,一包小食都唔夠餵,買左兩包呢!

 

名:松島遊覽船
址:宮城縣宮城郡松島町松島字町內 85
營:8:00am ~ 4:30pm
電:022-354-2266

大約 3pm 我地就返到碼頭,咁之後就去左參觀碼頭附近o既五大堂同埋国宝瑞巌寺。五大堂唔知係咪因為唔駛錢呢,其實真係超細,都冇乜野特別野睇;至於瑞巌寺,就要入場費 700 yen,當然就好睇好多啦~

 

 

 

名:五大堂
址:中央發賣場旁
費:Free

名:瑞巌寺(国宝)
址:宮城県宮城郡松島町松島字町内 91 番地
營:8:00am ~ 4:30pm
電:022-354-2023
傳:022-354-5145
費:700 yen

行到 4 點幾,我地就渣車返仙台啦,大約半個鐘車程啦,之後我地就到酒店 check-in,跟住係仙台站附近食晚飯 lu。

名:リッチモンドホテル仙台
址:980-0013 宮城県仙台市青葉区花京院 1-4-12
In/Out:2:00pm / 11:00am
電:022-722-0055

Day 7: 2008/10/29 角館、乳頭溫泉

Day 7: 10/29 (Wed) 陰

盛岡  角館(Kakunodate)  乳頭溫泉

早餐:盛岡-ホテル ジン
午餐:角館-???
晚餐:乳頭溫泉-鶴の湯別館山の宿 之一泊二食

住:乳頭溫泉-鶴の湯別館山の宿
訂房方法:經 田沢湖観光情報センター「フォレイク」網上預訂

今日係行程另一個好期待o既日子,因為今晚我地會去乳頭溫泉!至於點解咁期待,可能好多去過日本o既網友都知,但係我地就等陣先講,講左乳頭溫泉之前會去o既秋田o既角館先。

由盛岡去角館,大約要 1 個鐘左右,角館係秋田o既東部,佢有小京都之稱,周圍都係一 d 古色古香o既建築物,以前佢係一個武士之町,係角館站附近仲有好多保留左武士住宅風格o既地方,如:石黑家、青柳家、岩橋家、小田野家、安藤家等等,不過大部份都已經改做成旅客中心,參觀要入場費,咁入到去亦都有人解釋,仲有英文添!

我地今次就揀左去青柳家參觀,架車就停左係町營停車場,入場費係 500 yen。青柳家係 1772 年落成,佢好似扮演住角館博物館一樣,館入面有唔同o既分區:武器藏、秋田鄉土館、武家道具館、幕末寫真館等等,而且附設餐廳。

名:青柳家
址:秋田縣角館町東勝樂丁 26
電:0187-54-3257
傳:0187-53-2006

我地係青柳家入面行到大約 2pm,諗住係入面食午餐,點知我地去到果日,入面 2 間餐廳都比人包左場,冇得食!咁唯有出去周圍搵~食飽飯之後,我地係角館附近行多陣,就離開角館,經田沢湖出發到乳頭溫泉。我地首先到田沢湖 Tourist Information Centre 拎住宿 Confirmation letter ,之後就再出發到乳頭溫泉,由角館去,大約需要 1 個半鐘。

名:田沢湖観光情報センター「フォレイク」
址:秋田秋田県仙北市田沢湖生保内字男坂 68(JR 田沢湖駅構内)
電:0187-43-2111
傳:0187-43-2077
營:8:30am – 5:30pm/6:30pm

點解要去 Tourist Information Centre 呢?!睇開我個 blog 都知我一向係 Jalan 度 book 酒店,不過講到去乳頭溫泉,就冇得係 Jalan book 啦~而且果度幾間酒店,都要係直接同酒店聯絡,咁之前我係網上摷資料果時,比我搵到原來係田沢湖觀光情報中心個 web site 係可以係網上經中心職員幫手 book 的,雖然 book 完之後有封 email,不過就要係入住果日去中心度拎返張 confirmation letter 啦,會麻煩少少咁囉~但係,我 check 過橫掂都係路經,就麻煩左佢地幫手 book 啦~

之前講過,乳頭溫泉係今次旅程另一個令人期待o既地方,除左佢係幾百年來是有名的溫泉鄉,係日本人眼中o既第一秘湯,仲有另一個原因就係-佢係有「露天混浴」o既,顧名思義就係男女同浴啦~

乳頭溫泉呢度總共有 6 間溫泉旅館:鶴之湯妙乃湯蟹場孫六大釜同埋黑湯,間間都規模唔大,而且全部都係深山之中,好有味道。本來我地係想揀最古老o既鶴之湯,但係因為太受歡迎,好早就 full 左!~咁我唯有退而求其次,揀左佢o既別館「山之宿」,都一樣可以感受到佢 350 幾年o既開湯歷史。住過咁多次溫泉旅館,鶴之湯都可算係好傳統o既一間,入面o既物品都好傳統/古老,好特別~我地先到別館 check-in,放好行李,跟住就搭左酒店 shuttle bus 過去本陣,一試佢o既混浴啦~

 

    

溫泉區入面,除左露天混浴區之外,仲有幾間係男女別o既溫泉區,我地一行五人(四女一男)先各自浸男女浴,之後,就走左出去睇混浴區~其實混浴區o既泉水係奶白色o既,根本落左去浸就乜都睇唔到~而且,浸緊o既人亦都目不斜視,所以我地就好開心咁落左去浸啦~係呢個仍然得 8-10 度左右o既天氣之下,浸住溫泉,真係人生一大樂也! 

 

浸完之後,我地就返旅館食飯啦,今晚我地係食囲炉裏会席,係成組人圍住個炭爐燒野食o既,咁當然係由我主力燒啦~

 

 

名稱:鶴の湯別館山の宿 (Tsurunoyu Annex Yamanoyado)
予約番號:10-31
址:014-1204秋田県仙北市田沢湖田沢字湯ノ岱-1
In/Out:3:00pm / 10:00am
電:0187-46-2100

Day 6: 2008/10/28 小岩井農場、盛岡

Day 6: 10/28 (Tue) 微雨

奧入瀨  小岩井農場(Koiwai Farm)  盛岡 (Morioka)

早餐:奥入瀬-奥入瀬渓流ホテル之一泊三食
午餐:小岩井農場-農場餐廳
晚餐:盛岡-ぴょんぴょん舎冷麵

住:盛岡-ホテル ジン
訂房方法:經 Jalan 網上預訂

今日我地離開左青森,渣左 2 個幾鐘車落去岩手縣,今日o既主要節目係參觀小岩井農場,呢個項目,我覺得應該幾o岩我阿媽o既~

我地大約 11am 先去到,因為都比較晏,所以有 d 朝早節目已經完左,另外,有 d 活動係同其他野撞左時間,所以只可以揀一 d 我地有興趣o既野去睇啦,咁我地揀左必睇o既有有牧羊狗表演、搾牛奶、同埋參觀羊毛屋等等。因為牧羊狗表演係 1:30pm 開始,所以我地就先係農場其中一間餐廳食 lunch (因為又係落緊雨),食完先去睇表演同周圍行,我地係農場入面玩到差唔多 4:00pm 就走啦。

 

名:小岩井農場
址:020-0507 岩手県岩手郡雫石町丸谷地36-1
電:019-692-4321
傳:019-692-0303
營:9am – 5:30pm

之後,我地去左盛岡手づくり村參觀,佢好近農場,大約 10mins 車就到。呢個手造村係介紹盛岡傳統手工藝:和菓子、冷麵、木工、銅器等等,除左有得賣之外,仲可以參加體驗教室,我地咁晏先去到,當然係冇參加啦~係度行到佢閂門,我地就返盛岡市食飯啦。

名:盛岡手づくり村
址:盛岡市繋字尾入野 64-119
電:019-691-7611
營:8:40am – 5:00pm

離開手造村之後,我地就起程返盛岡市啦,我地先到ホテル ジン check-in,settle down 之後就行去盛岡駅前店食飯。

名稱:ホテル ジン
址:〒020-0045 岩手県盛岡市盛岡駅西通 1-6-15
In/Out:3:00pm / 10:00am
電:019-622-1115

黎到盛岡,有幾樣特色食品,好似炸醬麵、冷麵,咁我地今晚就揀左係ぴょんぴょん舎度食,佢其實唔係剩得冷麵o既,佢仲有其他料理,我地就叫左冷麵、飯、燒烤等等,一齊 share 食~

 

名:ぴょんぴょん舎
址:盛岡市盛岡駅前通 9-3
電:019-606-1067
營:11:00am – 12:00 mid-night (Last order: 11:00pm)

註:如果想食炸醬麵,或者會去岩手公園o既,可以試係係公園附近的白龍。

名:白龍
址:岩手縣盛岡市內丸 5-15
電:019-624-2247
營:9:00am – 3:00pm (本店 11:30am – 9:00pm)