December 2020
S M T W T F S
« Nov    
 12345
6789101112
13141516171819
20212223242526
2728293031  

Day 6: 2007/02/27 阿寒湖

Day 6: 02/27 (Tue) 陰

札幌  帶廣  阿寒湖

早餐:札幌-札幌ワシントンホテル
午餐:帶廣-元祖 豚丼のぱんちょう
晚餐:阿寒湖-あかん鶴雅別荘 鄙の座 之 1 泊 2 食

住:阿寒湖-あかん鶴雅別荘 鄙の座
訂房方法:經 Jalan 網上預訂
 
今日係成個 trip 入面渣最長時間o既車o既一日,會係札幌渣去阿寒湖,住全程最貴o既一間溫泉酒店, 有幾貴?四個人一間房,每人差唔多 HK$1,700 ,咁當然都係 1 泊 2 食,抵唔抵?!咁就要大家睇下佢o既服務同房間先再決定啦~ 本來因為想慳 d 錢,就 book 左架細o既 7 人車,但係成日係度諗唔知夠唔夠位放行李,咁o岩係出發之前兩個幾星期我係 Toyota 見到佢做緊冬の超割引,有成 30% off,咁,所以就轉左架大少少o既 (Picnic),可以等大家坐得舒服 d 啦。

租車網頁:

一早起身有 d 唔舒服,嘔左 1 次,但係精神都可以o既,係梳洗好之後我就去左搵 gary ,本來約好佢時間落去食早餐,點知 佢都唔係好掂喎,痾左成晚,一個病樣,咁我地兩個人都冇乜胃食,最後係咁易係酒店食左少少早餐之後就去拎車啦。(註:我覺得係因為 之前 1 日食得太多黑毛和牛啦,可能唔係好熟,同埋太肥膩啦,所以先會咁。但係 eppie 同 michelle 又冇事喎。)

今日係普通o既車,沿用返平時果個 GPS ,咁就真係方便好多啦,最簡單係只需要入目的地個電話號碼,就可以有路線 show 出黎啦, 除左佢 recommend 你果條,仲可以有其他 4 線唔同o既路線比你揀添,不過部機就只有日文,所以,識少少日文真係好好多o家。Check 完車,比晒錢之後,我地就返酒店接埋 eppie 同 michelle,拎埋 d 行李,出發去帶廣啦。

其實帶廣只係一個中途食飯o既地方,呢度最出名就係豬扒飯,其實都幾o岩我地 2 個病人食,起碼唔好食咁多生野先呀。到左帶廣, 泊左架車係 JR 站下面o既地底停車場,(註:頭 30 mins 無料泊車),之後就到元祖豚丼のぱんちょう食飯,由停車場行去只需要大約 10 mins 左右,佢係一間以 帶廣豬肉飯聞名的老字號,係 1933 年就已經開業,佢係用厚切o的上等豬肉,加上秘製醬汁,再用炭火而燒成o既,而且飯同豬扒分 為 4 個大小唔同o既 size,我覺得普通份量黎講,只要 order 梅或者竹就 ok 啦。

 

原本個 plan 係跟住會去和商市場o既,不過有一半係病人,所以就決定直接去阿寒湖,早 d 去享受 呢間 6 星級酒店。可惜,あかん鶴雅別荘 鄙の座個電話 number 部 GPS 冇,所以我就揀左附近o既酒店 做目的地啦。 check-in ,及食晚飯。

呢間酒店,全間淨係得 25 間房,而且每間房都有私人露天風呂同埋按摩椅o既,最細果間房都有成千呎, 我地今次揀左面向阿寒湖o既房。一去到酒店門口,已經覺受得好好o既服務,好似:有迎賓精美小食啦、一面 對住個湖,一面有專人黎幫手攪 check-in 啦、每個人可以自己選擇一套喜歡o既簡單和服啦等等, 大家都覺 得非常滿意。跟住就專人帶我地上房,同埋介紹晒房入面所有o既野,同埋解釋晚餐、早餐、公眾風呂等等。

 

因為我地係諗住食完飯去到阿寒湖冬華美 (阿寒湖氷上フェスティバル ICE・愛す・阿寒『冬華美』)會場睇雪祭同埋睇 8:15pm o既煙花大會,所以我地 揀左 6:00pm 就開始食晚飯啦。

呢一餐懷石料理,終於食左我地成 2 個幾鐘,攪到趕唔切出會場果度 set 野影煙花,不過好彩酒店安排得好 好,差唔多食完果時就提我地可以落 lobby,會放 d 椅係面對湖o既地方比我地睇,所以,都好快咁影左幾張煙花, 雖然係隔住塊玻璃,但係,都好過冇啦。之後,我同 gary 就出左去會場,但係,我地覺得簡直係比 d 雜誌同旅 遊書呃左呀!完全都冇野睇o既....所以我都冇影過相,而 gary 就係咁易影左幾張,反且之後我地覺得不如返酒店 影下佢o既建築風格好過啦~

 

 

駕駛資料:

起點 終點 距離 料金 預定時間 實際時間 備註
札幌 帶廣 217km 2,800 Yen 229 mins 220 mins 全個 trip 渣最長途車就係今日啦
帶廣 阿寒湖 117 km   122 mins 140 mins  

Day 5: 2007/02/26 小樽

Day 5: 02/26 (Mon) 晴

ニセコ  小樽  札幌

早餐:ニセコ-Eggshell Pension 之 1 泊 2 食
午餐:小樽-政壽司
下午茶:小樽-銀之鐘
晚餐:札幌-しゃぶ禅

住:札幌-札幌ワシントンホテル(華盛頓第一酒店)
訂房方法:跟機票 Package 以及經 Jalan 網上預訂 1 單人房

尋晚屋主話係 Pension 門口睇日出會好靚,所以 gary 就諗住今朝一早起身影相啦,有幾早...要 5 點幾囉,仲要超凍, 好彩都影到唔少靚靚相,至於我地 3 個,當然係訓到食早餐時間先起身啦~

今朝o既早餐我覺得份量比較之前一日o既午餐同晚餐都多,其中最特別呢就係個煙肉煎蛋,我地一路食一路研究左好耐,究竟點可以 煎到咁,係用一條煙肉包住,而個蛋黃係外表睇好似生蛋一樣,但係其實原來係已經熟晒喎,所以我地呢餐最後食成差唔多一個鐘!食飽 之後我地就離開ニセコ lu,會去小樽,之後黃昏時間就返札幌,要係 7:45pm 左右返到去還呢架 free o既車。

我地差唔多 11am 去到小樽,搵左好耐可以泊架車去邊,最後都係渣左係 JR 小樽站門口個停車場,不過,呢個停車場就唔平囉,同埋 要行去運河呀、哨子館呀果邊都比較遠,所以唔建議大家泊架車係果度。

原定計劃係先去運河附近o既小樽博物館參觀,點知行到去門口,先見到佢貼住,Temporary Closed!好慘耶~~咁就唯有直接去運河 啦。其實小樽以前係一個海港,運河旁邊就係當時o既貨櫃,而條運河,當然就係用黎運貨啦。行到去差唔多最尾果度,有間屋仔,仲有個 溫度計,今日係得零下 1 度左右咋,而為左影低呢個度數,慘劇就發生左啦,就係我成個人撞低左,仲要成部相機跌左落地,不過唔知好 彩定唔好彩,我係運河果度開左個 hood 出黎用,平時我唔用o家,所以 d 力瀉晒過去個鏡頭 hood 度,當然佢就爛左啦,但係個人同埋 部相機都冇事喎,真係不辛之中o既大辛啦,而且當我跌低,我附近 d 日本人都即時幫手,仲教我拎 d 新雪去去到消腫添。

黎到小樽,當然就要食壽司啦,呢度有條街果度有成 15 間壽司店,較出名就有政壽司、華壽司、幸壽司、寬壽司等等, 我就揀左去食政壽司,原來都離開運河幾遠下,本來我諗大約 10mins 可以去到,不過因為地面超滑,所以要好小心咁行左成 20 mins 先去到。政壽司有 2 層,1 樓係 bar 枱,而 2 樓就係有普通枱,落單o既,我地揀左坐 bar 枱,因為諗住可以睇住 d 師傅整嘛, 但係 gary 後尾話我地 share 野食,應該坐 2 樓好 d 喎,諗落又係喎,咁如果下次再有機會黎就坐 2 樓啦~嘻嘻。因為今日係星期 一,所以有好平o既 set lunch,叫左幾個 set 同埋散叫左 d 野之後,大家就食得好開心啦,最特別就緊係要叫係 日本先有o既黑色赤貝啦~唔知係咪已經食左幾日唔錯o既日本野,反且我覺得佢 d 壽司又唔係真係超級好味喎,有少少名過於實o既 感覺囉,應該話,以佢o既價錢,我 expect 應該更好味囉~

之後,我地就去哨子館參觀啦,其實「哨子」即係我地o既玻璃,我地去左最出名o既北一硝子館,它係小樽度有幾間分店,間間賣o的 野都有唔同(註:如果沒有時間,可直接去最大o既 3 號館),如果有興趣,可以參加佢地o既 class ,自己整玻璃杯,大約要 1 個鐘 左右啦。

沿路行到最尾,就會見到小樽音樂盒堂本館,佢門口有個會噴蒸汽o既鐘,好易認o既,音樂館有三層,入面有超過 3000 個音樂盒, 而且如果想自製一個獨一無二o的音樂盒,可以直接到 3 樓,入面有唔同o既材料,可以等你整返幾個送比朋友,如果唔識整,仲會有 工作人員教你添,需時半個幾鐘。咁行到呢度,我地留低左 eppie 同 michelle 係度,因為佢地話想整喎,而我同 gary 就行返去渣 架車過黎,咁 d 時間應該都差唔多o既。我地過左成 45mins 先返到黎,點知,佢地 2 個仲未走得!仲要話等得起碼半個鐘...真 係激死人啦~都唔明點解要攪咁耐。咁我地唯有將架車泊係路邊,之後去飲個 tea 啦。等埋佢地個音樂盒攪掂,就已經大約 5pm ,咁 當然去影埋運河o既 magic hour 先走啦,影到大約 6pm,我地就起程返札幌啦。

 

返到札幌酒店,還完車我地就打的去左 しゃぶ禅 食晚飯,佢有好多種唔同o既放題可以揀,詢問左大家o既意見之後, 我地揀左最貴o既黒毛和牛放題,120 分鐘任食 (5,800 yen),而我係出發之前已經係網上 print 左佢張 discount coupon 出 黎,今日有 10% off,YEAH!日本人o既 shabushabu 放題同香港食開o既唔係好同,佢淨係得牛肉、蔬菜、烏冬同埋拉麵o既,不過淨食牛肉已經抵返晒, 一拎黎,見到 d 牛肉o既脂肪好平均咁分散係每片牛肉果度,但係放落口,又完全唔覺得肥膩喎,依家諗返,都真係流晒口水呀!

本來諗住食完去行下,點知 d shops 都差唔多全部閂晒 lu,咁唯有返酒店訓覺啦。

駕駛資料:

起點 終點 距離 料金 預定時間 實際時間 備註
ニセコ 小樽 89km   122 mins 110 mins  
小樽 札幌 39km 1,200 Yen 47 mins 60 mins  

Day 4: 2007/02/25 札幌、ニセコ(二世古)

Day 4: 02/25 (Sun) 雪

登別  登別地獄谷  ニセコ(二世古)

早餐:登別-ホテルまほろば 之 1 泊 2 食
午餐:ニセコ-Eggshell Pension
晚餐:ニセコ-Eggshell Pension 之 1 泊 2 食

住:ニセコ-東山エッグシェル(Eggshell Pension)
訂房方法:經 Eggshell 網頁 或 email 預訂

今日個行程比較簡單,我決定一早起身再去浸溫泉,所以我 6 點就起左身啦,跟住 7:30am 就去左食早餐,今日仍然係有好豐富o既 buffet ,日日咁食法,真係唔肥先至奇啦~~~

我地 check-out 之後就渣埋架車去地獄谷,其實係好近咋,不過費事行黎又行去,但係就冇啦啦要比停車場費囉,我地當然又係附近 四周圍行,原來地獄谷個 area 真係幾大下,地點寫住行晒要成 3 個鐘,但係我地只係行左近入口o既地方,一去到就已經聞到好勁o既 硫磺味,四周都有 d 煙係谷底升上黎,都唔似地獄,不過可能因為冇乜草,所以好蕭條咁啦,所以就改左個咁o既名啦~

大約 9:45am 我地就離開登別 lu,今日淨係會去ニセコ(香港人叫佢做「二世古」),車程大約要 2 個鐘,其實ニセコ佢係冇個漢字 o家,所以大家一定要記得佢個日文寫法。而ニセコ係北海道好出名滑雪o既地方,d 雪不單只多,而且好靚同埋好厚,最適合冬天o既雪上 活動,今次我就揀左係住係一個日本人家庭開o既 Pension 度,希望感受一下當地人o既生活,我就特別 book 左 cottage,係有個客廳o既。 呢個 Pension o既好處就係屋主係識英文o既,我地去到亦都見到有 3 批唔同o既香港人係度住,另外,屋主亦都會幫忙大家安排各種活動,所以都幾好o家。

去到 Pension,因為唔想再渣車出去,(佢附近冇野食!)所以我地係 Pension 度食埋午餐,二揀一,有咖喱飯同蝦意粉,可惜我 覺得佢比較細碟,如果有大食o既朋友,應該係唔會夠飽o家!

因為 gary 同 michelle 都唔諗住滑雪,所以我係二月頭以 email 聯絡過屋主,希望可以幫手安排玩 snow shoe,佢就幫我地 arrange 左 1:00pm 開始,只係我地 4 個人o既 tour,大約玩 2-3 個鐘,1 個人要 3500 yen。去到間 shop 度,唔知係咪因為我地 幾個人隻腳個 size 都係比較細,所以最終攪左成 45 mins 先搵到有o岩的鞋比晒我地,同埋原來租 equipment 係要 extra 比錢o家, 仲要成 2000 yen 一個人,真係好鬼死貴!

之後,阿領隊帶住我地 4 隻鴨仔就出發啦,係一個冇乜人o既山頭行黎行去,果度 d 雪真係超級靚,完全係冇人去過咁,仲有 d 新雪落落黎,望過去真係好靚,不過,如果大家都會玩 snow shoe,記住唔好著咁多衫,同埋唔駛著厚 sock,因為一路行真係好熱 o家,我地後尾都又熱又攰,行冇 2 個鐘就已經想返去啦。係途中,所有 snow shoe tour 都會停低,阿領隊會拎 d 熱 coffee 出黎 比大家飲o既,不過我就唔好啦,係呢個休息時間,我地反且打起雪戰同砌左個雪人添。

本來諗住玩完 snow shoe 睇下去唔去滑雪,但係玩完真係好鬼攰,所以就直接返左 pension,到左 6:30pm 左右,我地 係 Pension 食左西餐,好好味(不過都係比較細份)!食飽我地渣住架車係附近周圍去,不過周圍都已經黑晒,乜都冇野睇啦,所 以兜左陣風就返去訓覺 lu~

駕駛資料:

起點 終點 距離 料金 預定時間 實際時間 備註
登別 ニセコ 108km 1,350 Yen 132 mins 140 mins  

Day 3: 2007/02/24 札幌、登別

Day 3: 02/24 (Sat) 晴/雪

新宿  羽田空港  新千歲空港

早餐:無

今日 Gary 會一早搭早機黎札幌,我本來交低左 d 乘車時間表比佢,諗住佢會搭 JR 去羽田空港,搭 9:30am 起飛o既機, 不過,原來我比佢 d 時間有 d 唔o岩,佢最後要係酒店打的去新宿站,再搭 JR ,由新宿去羽田o既 JR 仲要轉車添,都好趕同好 麻煩,車費就約 660 yen 啦。(註:下次都係搭機場巴士好過,1200 yen 又唔駛轉車,都係 1 個鐘左右。)

好彩後尾都趕到班機,不過最後班機竟然係 delayed 左,早知就唔駛咁趕啦~而最後佢由本來 11:05am 到札幌,變左大約 11:35am 先到。

Day 3: 02/24 (Sat) 晴/雪

札幌  新千歲空港

早餐:札幌ワシントンホテル

經過之前一晚o既經驗之後,我地今日決定比預定時間早少少出門口,我地約 8:30am 就落去食早餐(酒店 package 包), 之後就執埋野去 check-out ,由於有 d 阻滯,攪左一陣先拎到車!(註:原來要係 check-out 果時問 counter 拎張單,咁停車場 就有 discount。)

之後就去研究果個 GPS 啦,我地會先去機場接 Gary ,然後就去到登別先食 lunch,咁部機個時間都話大約 1 小時就去到, 我地係酒店 10:10am 左右開車,預左約 11:30am 到機場囉,應該 Gary 就差唔多出黎啦。可惜,諗唔到...係札幌市內係超多車, 同埋超多燈位!(好似旺角咁!)本來 10km o既路程,行左差唔多半個鐘先上到 highway,果時已經差唔多 11am lu~

未去到機場,仲有 5km 右右o既路程o既時候,就收到 Gary o既電話,好彩佢都係o岩o岩落機,咁就當然係叫佢唔駛急啦, 我地都仲未到,最終,攪到成 11:45am 左右先去到機場,而且,去到機場,仲行左入去停車場果條線,唯有停係果度,順便等大家 去一去方便啦。

Day 3: 02/24 (Sat) 晴/雪

新千歲空港  登別海洋世界  登別地獄谷

午餐:登別-福庵・そば茶屋
晚餐:登別-ホテルまほろば 之 1 泊 2 食

住:登別-ホテルまほろば(Hotel Mahoroba)
訂房方法:經 Jalan 網上訂

接左 Gary 之後,就由 Gary 渣車去登別啦,我地 12:15pm 出發,今次好快咁就上左 highway ,沿路簡直就係車過車,雖然路牌寫 住車速係 80km,但係架架車都起碼行緊 100km,我地就 average 行 120km 啦。

我地大約係 1:15pm 去到登別,因為我地今次 book o既 package 係連海洋世界o既入場卷,所以我地先到酒店 check-in 同埋拎換領卷 先。但係因為酒店 check-in time 係 2:00pm ,所以未有房比到我地,咁我地就去食 lunch 先啦。

我一早就諗住今日 lunch 去食冷麵,亦都搵左間係溫泉街o既 shop 福庵・そば茶屋,網上面好多網友都去過,亦都好多推介, 不過佢個 operating hours 係 11:30pm~2:00pm & 6:00pm~10:30pm,我地去到佢門口已經差唔多 1:45pm 啦,諗住佢都差唔多閂 門,但係我見到仲有人係入面食緊野喎,咁就推開門入去睇下啦,佢地仲好歡迎我地,請我地坐低,咁當然我地就唔駛再兩頭搵其 他野食野啦~我地 1 人叫左 1 個 set,唔係好貴,又好大份,食左大半個鐘(呢個時候仲有其他人入黎食野!)我地就閃啦。

之後,行返酒店(只需 5 mins)拎埋房o既 keys ,拎晒 1 泊 2 食 o既 coupon 同埋海洋世界換領卷,好快咁拎晒 d 野入房,就 又要出發 lu。

登別有三個主題樂園,包括登別海洋世界、伊達時代村及熊牧場,我地今次會去海洋世界。由酒店渣車過去只要 10 mins 左右, 但係個 GPS 竟然冇呢個登記!!所以我地又係架車到攪左差唔多半個鐘都未可以出發...終於係要入日文,諗住去到附近 JR 車站再算, 而佢 5 點閂門,我地最終係 3:30pm 先去到,所以只係行得粒半鐘,都算係一個遺憾~(註:所以唔駛錢o既野有時真係...)海洋世 界個外觀好似一個小城堡,由幾座唔同 building 建成,我地只係行左其中最大果兩座,我覺得都算有幾多野睇,又有 d 幾特別o既 魚類,尤其係因為唔駛錢,所以覺得都幾抵下~

我地 5:30pm 返到酒店,攤抖左陣,同埋又執過 d 行李,(冬天實在要拎太多野啦!),之後 7:00pm 就落左去食酒店好出名o既蟹 放題啦。我地試晒北海道 3 大蟹,當然仲有其他海鮮啦,我仲食左超多甜蝦添,最後呢一餐食左成 2 個鐘,差唔多 8:45pm 先係餐廳 走人。食到咁飽,緊係應該出去散下步啦,行左去溫泉街同埋地獄谷門口,影左 d 相,決定聽朝早 d 起身,過黎望下先再出發,到 10pm 我地 就返酒店 lu 。跟住,當然就係去浸溫泉啦~呢個酒店最出名就係...佢有十幾個唔同o既溫泉,可算係日本一個比較大型o既溫泉酒店, 我地 3 個女就係溫泉果度浸到成 11 點幾先返房訓啦。(註:日本o既溫泉係唔可以著衫o家,所以呢次仲要係第 1 次大家玉帛相見添!)

駕駛資料:

起點 終點 距離 料金 預定時間 實際時間 備註
札幌 新千歲空港 45km 1,800 Yen 47 mins 90 mins 札幌市內好塞車,如果要去機票,真係要預返多 d 時間
新千歲空港 登別 76km 1,250 Yen 54 mins 60 mins  

Day 2: 2007/02/23 新宿 (Gary)、札幌 (Others)

Day 2: 02/23 (Fri) 陰/雨

新宿  銀座

早餐:無
午餐:便利店
晚餐:便利店

住:新宿-西鉄イン新宿(西鐵 Inn)
訂房方法:經 Jalan 網上預訂

本來原定 Gary 係要考試,不過後尾因為某 d 原因,就 cancel 左,所以今日佢好晏先起身,跟住一個人去左新宿 Nikon 度 睇野,之後因為落雨,所以返左酒店啦,而到冇乜雨o既時候就去左渋谷同銀座果邊,幫我買相機袋同佢自己要買o既菲林啦。

Day 2: 02/23 (Fri) 陰/雨

香港  成田機場  新千歲機場  札幌

早餐:機場-大家樂
午餐:成田機場-京城友膳
晚餐:札幌-坐.和民

住:札幌-札幌ワシントンホテル(華盛頓第一酒店)
訂房方法:跟機票 Package

至於我地呢...因為係搭早機,所以今朝一早就起左身,到左機場就搵左 Michelle 同 Eppie,之後就入閘同去食早餐啦。今次 再搭 ANA,發覺佢地空姐o既質素比上次差好多囉~(Gary 後尾都係咁講!)今次去札幌,ANA 係冇直航機o既,直航貴好多呢~咁所以就要係成田機場果度轉機啦,落機又要拎返 d 行李,不過好彩唔駛再 Check-in,攪掂好 d 野之後,我就去左綠色窗口買 釧路 SL 冬の湿原号 o既票先,之後就係機場 d shops 度睇左陣野,然後就 搵左間舖頭食野啦。

我地雖然有 3 個人,不過就只係叫左 1 個 Set 同 1 個咖喱鳥冬,都幾好食o家~食完就差唔多夠鐘入閂啦。

日本o既內陸係冇野食o既,只係有野飲,不過好快就到札幌,所以都冇乜所謂啦。到左札幌,真係覺得凍左好多,停左機係窗度望出 去,已經全部都係雪,真係開心!

去到行李帶果時都仲未有行李出黎,咁唯有等下啦,咁又趕住去拎車喎,人地 8 點閂門,我地班機就 7:30pm 左右先到,不過好彩 等到 50 分左右已經得左,咁我就快快手手去租車 counter 果度,點知已經閂晒門,好彩佢係 counter 前貼左 d 紙仔,叫人用果個電 話就可以接通,有人會 follow up 。

等左 15 分鐘左右,有人渣左架 shuttle 黎接我地,去到拎車果 counter ,辦好晒 d 手續,就有旅遊局o既職員教我地用 果個新o既 GPS 啦,嘩,真係好大部!之後,佢仲幫我地入好個目的地,咁我地就渣車返札幌啦,呢個時候,已經差唔多 9 點鐘啦。

第 1 次用果個 GPS ,真係唔係好習慣,行錯左好多路,而且又行錯左幾次上 highway ,仲要係要比錢果 d ,攪到本來預計 1 個鐘 頭o既車程,渣左 1 個半鐘都未到目的地!呢個時候,我開始好奇怪,明明知道間酒店就係札幌站對面,點解佢好似不停咁指緊我去另一 邊呢?!再渣左 15 分鐘之後,我決定唔理部機!跟 d 路牌去札幌站,而最後事實證明,我呢個決定係o岩o既,而我地終於係差唔多 11 點去到酒店啦。

Settle down 之後,就係落街去搵野食啦,本來諗住行去狸小路,點知行過 2 條街咁上下,就見到有間餐廳(坐.和民),見到佢 樓下寫住收 2 點半,當然唔埋三七廿一,上左去先算,跟住叫左好多野食,食飽就返酒店啦。

駕駛資料:

起點 終點 距離 料金 預定時間 實際時間 備註
新千歲空港 札幌 45km 1,850 Yen (應該約 1,250 Yen) 47 mins 120 mins 由於入錯目的地資料,
所以行左好多錯o既路。

Day 1: 2007/02/22 新宿

Day 1: 02/22 (Thu) 晴

香港  成田機場  新宿

晚餐:飛機餐

住:新宿-西鉄イン新宿(西鐵 Inn)
訂房方法:經 Jalan 網上預訂

今日係大年初五,雖然我要返工,但 Gary 就今日出發啦,不過因為 Book 唔到早機去,所以係屋企食完麥記先出發,係下午機,落機已經大約 8 點幾,不過可能因為佢一個人啦,所以係日本海關 check 得好緊喎,所有野都開晒出黎睇,另外,個 關員仲同佢用國語對答,對佢果 d 相機器材仲好有興趣添。

攪左好耐之後就出左機場,點知下一班 Narita Express 要等成粒鐘先有車,所以佢就一個人係機場果度等車啦,好彩有個同 ANA 租 o既日本電話比佢玩,都消磨左唔少時間(不過,唔知用電話上網點計錢法呢,我到時真係要同佢 Claim 錢先得!)。

終於攪到成 11 點先去到新宿,跟住就行錯左路,去到西鐵 Inn 已經成 12 點啦,係又冬又辛苦咁拖住 d 行李之下,行左成粒鐘, 點知去到 Counter,佢話冇 Record ?!好彩佢搵左陣就 check 到 d 資料o者,如果唔係,都唔知點算好...(後尾發覺,原來張 confirmation email 漏左係屋企唔記得拎去!)