December 2017
S M T W T F S
« Nov    
 12
3456789
10111213141516
17181920212223
24252627282930
31  

冬の北海道必備物品

呢度想講o既係,落緊雪o既北海道,即係氣溫係零度以下~

厚大褸:可以係羽絨,或者係 Gore-tex 。如果係好怕凍,可以係 gore-tex 入面著件薄羽絨或者 fleece。我因為唔係好怕凍,所以只係著件厚 gore-tex 加冷衫。

頸巾:一定要帶頸巾,因為可以遮住個口同鼻,真係會暖好多!

帽:最好係 fleece ,厚身,包到耳仔o既。

手套:睇下會唔會玩雪,會o既話,就要防水手套;如果唔係,就要 fleece 果 d 。我就 2 款都帶左去,尤其係因為我地要影相,平時用 fleece 會方便 d 。

褲:如果要玩雪,一定要帶防水褲/雪褲,唔係可以著牛仔褲,因為咁會凍死的。

鞋:一定要著有 gore-tex o既,因為一踩落雪地就成隻鞋濕晒,隻腳會好凍。至於駛唔駛一定要買雪靴,就見人見智,我同 Gary 地就專登買左對有牌子o既,因為見過有網友話平果 d 會入水喎,另外雪靴會有防滑,著落去真係好似好好多咁~

潤唇膏:咁凍,個咀會好乾,要帶比較潤同有防曬功能o既潤唇膏,仲要記得要隨身攜帶。

如果好怕凍,就要拎埋以下o既野啦~

打底衫褲:可以保暖同吸汗o既打底褲,例如:天蠶衣、貼身褲、legging 咁。

用完即棄暖包:如果長時間會係室外,可以拎暖包或者貼係身。如果要戶外影雪景,都幾有用,另外,可以放包係相機附近,保持溫度,咁電池都可以用耐 d 。

即沖飲品:好似黑糖薑茶呢 d ,個人即時會暖好多~

2007/02 白雪茫茫之北海道自駕遊 (後記)

今次o既旅程真係好開心,始終覺得係東南亞呢 d 國家入面,去日本係最開心o既,想文明有文明、 想去 d 郊區又有、食就當然係正啦、地方清潔又乾淨、大部份o既日本人又有禮貌,而且,搭飛機又只 需幾個鐘,就係一個唔錯o既選擇。

呢次個行程可以話差唔多玩晒成個冬天o既北海道,由札幌去登別、二世古果邊,再去道中同道東,真係好耐未 試過渣咁耐車,但係可惜今次都有幾個遺憾,好似小樽博物館、旭川雲之美術館、破冰船等幾度都去 唔到,但係,反轉黎諗,可能呢個就係留返個藉口,比我地再 plan 下一次黎北海道重遊o既原因啦~(笑) 而且,我仲有成廿幾萬 yen 現金因為唔記得帶(好慘呀!)而留左係屋企,唔通真係叫我好快咁 又再黎過日本?

仲有一樣,就係今次去日本,差唔多所有相機野都拎晒去,雖然真係好重好重,(已經好好彩咁我地係渣車, 否則...),不過,睇返今次 d 相,真係覺得係值得o既,所以攝影o既網友唔好成日問去邊邊邊旅行 應該拎邊支邊支鏡啦~全部都拎晒去啦~~

Day 10: 2007/03/03 札幌

Day 10: 03/3 (Fri) 晴

札幌  場外市場  新千歲空港  羽田空港  成田空港  香港

早/午餐:札幌-場外市場
下午茶:新千歲空港-機場便當
晚餐:飛機餐

今日 d 時間比較難攪,因為我地要搭 1:30pm o既機,咁我就 book 左 12:30pm 係機場還車,去由札幌去機場其實只 係 1 個鐘,但係就怕好似早幾日去接 Gary 咁勁塞車,你知啦,今次係搭飛機,唔可以遲到嘛,所以大家就諗住最遲要 11:00am 係札幌出發啦;但係另外呢,大家都冇真係 shopping 過,所以團友們就好想去行下喎。最終就 agreed 左唔去 shopping ,又唔駛咁早起身,大約 9:00am 左右去場外市場果邊食早餐同埋買手信啦。

場外市場其實可以話係日本人o既街市,成條街 d 舖頭都係賣海鮮o既,雖然大部份都唔係活o既,不過真係好多野賣。 我地去到搵左間頗大o既舖頭「北之漁場」,佢樓下係賣海鮮,而 2 樓係食野o既地方,我估都應該唔錯o卦。

 

上到去,因為係釧路唔夠時間去煉瓦果度食鐵板燒,所以雖然係一大早,除左叫左刺身飯之外,我地仲叫左個燒烤餐同鮑魚,等大家可以燒下~點知,呢 一燒就燒左我地 1 個鐘,跟住唯有各自好快咁落去行多轉,買下手信咁,而我大部份手信都係係呢度買咋~

 

之後我地就離開札幌 lu,去到機場,好順利咁還完車,check-in 完就上機啦。呢一轉我地去到東京係要 轉機場o既,因為雖然好早已經去訂機票,但係係成田返香港o既機幾日都 full 左,所以我地就要係札幌飛羽 田(Haneda),再由羽田去成田(Narita)返香港啦。

我地中間有大約 3 個半鐘o既轉機場時間,由羽田去成田最快係搭機場巴士(Limousine Bus),只需大約 60 分鐘,反且如果搭 JR,要成 1 個半鐘,不過就要 3000 yen 。而我地後尾發現,原來係羽田出閂到行機場巴士上車果個站都好近,我估只需 5 分鐘左右,而且又差唔多 10 分鐘就有一班車,所以都幾方便。

最後,我地係差唔多 11pm 就返到香港 lu,而呢次o既旅行亦都完滿結束啦。

駕駛資料:

起點 終點 距離 料金 預定時間 實際時間 備註
札幌 新千歲機場 45 km 1,250 yen 47 mins 65 mins

Day 9: 2007/03/02 旭川、札幌

Day 9: 03/2 (Fri) 晴

層雲峽  旭川  札幌

早餐:層雲峽-層雲閣グランドホテル 之 1 泊 2 食
午餐:旭川-梅光軒拉麵
晚餐:札幌-かに本家

住:札幌- ブルーウェーブイン札幌
訂房方法:經 Jalan 網上預訂
 
今朝係比晏起身o既一日,點解?!因為今日去o既 旭川動物園 10:30am 先開門,而係層雲峽渣車去果度,只係要大約一個半鐘,所以我地 9am 先係酒店度出發,咁就唔駛咁早起身啦, 不過,當然我地又唔 side d 時間,朝早就落去浸一浸啦~

咪麼左好耐,食完早餐之後成 9:30am 先出發,去到旭川動物園差唔多 11 點啦,冬天黎旭川動物園,除左有北極熊、海豹 等等之外,重頭劇係只係冬天先有o既每日 2 次o既皇帝企鵝巡遊,時間分別係 11:00am 同 2:30pm,本來黎到已經諗住睇唔到朝早果 場,因為成條巡遊路線已經比人佔據左,我地幾經辛苦先搵到一個好少少o既位置影相,點知原來 d 企鵝係會行成 1 個鐘o既, 出黎之後會沿另一邊行返去起點,所以我地後尾就轉左位,影左好多可愛o既企鵝相啦。

 

之後,我地就去睇北極熊啦,只見佢好歎咁係度晒太陽,只係有時開張隻眼望下 d 遊人之後又再訓過,仲唔知係咪覺得 d 人太嘈,用隻手遮住隻耳仔訓覺添,好鬼好笑~另外,我地又見到白狐、白色貓頭鷹、白鹿等等,真係同白色o既北海道好鬼 夾!

 

行完動物園,我地就去左旭川o既雪之美術館,呢個係加插o既,本來冇話一定要黎,不過 Gary 睇完 d 相話覺得好靚, 咁又順路,咪黎走一轉囉。講返呢個雪之美術館,其實佢係一個美術工藝村果度,分別有「雪之美術館」、「國際 染織美術館」同埋「優佳良織工藝館」,不過我地就淨係對雪之美術館有興趣,所以冇買套票入去。呢間館o既建築真係 好靚,佢係 18 米o既地底,入左去簡直好似去左童話城堡咁,無論係每間房o既門啦、天花啦、掛牆燈啦等等,都好似 同我地依家呢個時代唔同,覺得所有野都高貴 d o既。而其中最特別就係佢有個音樂廳(仲有豎琴!)、宴會廳、畫廊等等, 我覺得如果可以係呢度影婚紗相,應該會好靚o家~最可惜就係佢內部有 1 part 維修緊,冇得入去睇,所以我地好快咁睇 完就走 lu。

 

 

跟住我地返去市中心食 lunch ,返左去 JR 旭川站附近o的梅光軒度食好出名o既旭川拉麵,我地去到佢都差唔多打烊 lu,因為差唔多 3 點,呢度有出名o既牛油 拉麵,我地各人叫左一碗,點知我果碗超大呀!當然又係食唔晒啦~~

之後我地就打道回札幌 lu,我地係旭川走果時大約係 3:30pm,我地入左札幌落個 GPS 之後,做左一樣全程最錯o既野, 就係諗住依家仲早,唔行「有料」道路,行左條「國道」,佢個 System 話要 4 個鐘左右,而有料話 1 個半鐘左右,費用 好似三千幾 yen 咁上下啦,點知...d 國道真係好多車o家!呢後 140km o既路程,真係行左 3 個幾鐘!仲要係後尾頂 唔順,轉左條 route ,行返 highway 先可以 3 個幾鐘返到去,所以最後 shopping o既希望都冇埋啦。

最後係札幌呢日我揀左間好平o既酒店,就係 ブルーウェーブイン札幌(Bluewave Inn Sapporo),有幾平?!就係 1 個 人大約係 2800 yen 1 晚,即係雙人房只係 HK$364 左右!不過當然冇早餐食啦。嗯..點解佢咁平?!一來佢係 JR 札幌站 遠少少,二來佢係一間 Inn ,唔係 Hotel,不過我地都係渣車,咁就冇乜所謂啦,而入住之後,都覺得唔錯呀,間房比新宿果 d 成千蚊 1 晚o既都差唔多,好整齊乾淨。但係有一樣要留意o既就係 7 人車係入唔到佢自己個停車場o既,要停係佢 對出果個停車場囉,不過都 ok o家,對面馬路咋。

  

係酒店 settle down 之後,我地就打的去 JR 站果頭(要 1000 yen),大家都諗住最後試下仲有冇 shops 係未 closed ! 其實呢個時候只係 8:00pm 左右,對我地香港人黎講真係好早,我地分開左去行街,但係...結果...當然係大部份 都閂左啦,好彩我同 Gary 想去o既 Bic Camera 係閂 9pm,所以我地 2 個好高興咁買左 d 相機野(仲有我早幾日爛左果 個 hood 都有貨,yeah!)同埋 Game o既 accessories,之後大約 10:00pm 就 join 埋 Michelle 同 Eppie 去食 dinner 啦。

係北海道最後一個晚餐,Gary 又想去食蟹啦,所以我地揀左去 JR 站對出o既かに本家(蟹本家),點知呢間又閂 11:00pm,咁當然係唔夠時間啦,所以我地就返去すすきの(薄野)果間啦, 因為呢間閂晏 1 個鐘o既,而且呢間係我地酒店出面 1 條街左右咋。

我地叫左 2 個 Sets 同埋散叫左 d 刺身呀咁,當然又係放到成枱都係啦,不過,我個人覺得東京 o既かに道樂(蟹道樂)比佢抵食同埋多 d 選擇,唔知係咪因為 先入為主呢?

 

駕駛資料:

起點 終點 距離 料金 預定時間 實際時間 備註
層雲峽 旭川 75km 77 mins 60 mins
旭川 札幌 170 km 1,250 yen 109 mins 180 mins 冇跟個 GPRS 行要比錢o既 highway,終於用左成 3 個鐘先返到札幌。

Day 8: 2007/03/01 網走、層雪峽

Day 8: 03/1 (Thu) 晴

網走常呂町  網走  層雲峽

早餐:常呂町-民宿 船長の家 之 1 泊 2 食
午餐:日本杯麵
晚餐:層雲峽-層雲閣グランドホテル 之 1 泊 2 食

住:層雲峽-層雲閣グランドホテル
訂房方法:經 Jalan 網上預訂

今日係比較「他條」o既一日,只係 plan 左去網走坐破冰船,之後就冇特別 plan,可以早 d 去層雲峽,又 或者係網走流冰館等觀光一下。因為係民宿去網走都大約要 45 分鐘車,而我之前 made 左o既破冰船 booking 係 9am, 所以本來預左約 7am 就食早餐,點知,原來呢度係 fix 死左朝早係 7:45am 大家一齊食早餐,所以,今朝就變得好趕啦。 (之前一晚已經知道。)我地係第一批去到o既住客,之後,只係用左約 30 分鐘,就食晒佢個早餐(當然又係食唔晒啦), 跟住就即刻 check-out,走人、出發。(註:其他會去o既網友真係要留意一下!)

去到碼碩差唔多 8:45am,我地應該係搭網走流氷砕氷船「おーろら」 (破冰船 Aurora)o既,呢架係全程大約 1 小時的觀光破冰船,佢有 2 層,2F 有特別席,最好就係企係甲板上,親身體會 流冰的破/碎冰o既聲音,如果天氣同運氣好o的話仲可能會見到白尾鷲添。(註:最好一早預約,fax 去就得o家啦,最早 係 8:00am/9:00am,而 4:30pm 係最後一班,而如果你果預約係 ok o既話,佢會 fax 返張紙比你,上面有個印仔同埋你個 預約 number o既,咁只要開船之前 15 分鐘去到就得啦。Sample Fax 係呢度)

好啦,終於趕到去,仲冇遲到,咁就拎張 fax 入去比錢啦,呢個時候都覺得好奇怪o家啦,點解會咁冷清清o既,人都唔多 個喎,原來...職員話今日太大風同大浪啦,所以...停航...嘩,超慘呀~早知唔駛咁趕啦,而本來朝早 8:00am 同跟住 10:00am 果班都係 cancelled 左,咁我地傾左陣,決定係度等到 10:00am,睇下 11 點幾個班點啦,最後,都係 cancelled!

  

咁我都有準備 d 後備地方可以去,見大家都冇乜意見,既然冇得出海睇流冰,我就決定去近近地o既流冰館望下啦,由碼頭 渣車去大約 20 分鐘車左右,個流冰館係一個小山坡上面,樓高 3-4 層,小小o既一間,入面有零下 18 度o既體驗,如果你拎 條濕毛巾入去,可以卷埋變成一支冰棍o家!不過,可能呢幾日都凍到習慣晒,入到去又唔係真係覺得好凍喎。除左呢樣野之外, 佢仲有套 3-D movie 睇,講流冰o既形成,同埋係流冰上生活o既動物等等,真係拍得好靚,藉得一睇。而係天台望出去o既一遍 藍天白雲,都令我地不停咁影左好多相,不過,真係超凍呀!

之後,我地就離開網走,去層雲峽啦,點解咁早,因為今晚我地會 去層雲峡 氷瀑まつり(層雲峽冰瀑祭)睇冰, 咁當然係早 d 去到,早 d 食晚飯跟住就可以去睇啦,而且雖然呢個時候係 12 點幾,大家都仲係好飽喎, 咁就諗住去到先算啦。

去到層雲峽大約係 2 點幾 3 點,我地去左酒店層雲閣グランドホテル(Grand Hotel) 度 check-in,跟住就諗住去溫泉 街度食少少野,但係原來冇乜舖頭開門,而且我地 6 點又食晚飯,所以最後就係 7 仔度買左幾個日本特色杯麵返去酒店食 lu。 嗯,點解住層雲閣グランドホテル?因為呢間係最近冰瀑祭會場o既酒店,由酒店行過去大約只需 10 分鐘左右啦,不過就要 慢慢行,因為呢度 d 冰真係好滑!

 

試完唔同o既杯麵同 settle down 之後我同 Gary 就小睡左陣,而 Michelle 同 Eppie 就係酒店度周圍逛,不過我覺得呢度 比登別仲隔涉,真係冇乜野好行,訓返一覺仲好啦。食飯之前,Gary 仲唔死心咁用電話上網 check 下網走破冰船o既情況, 先發現今日真係好多班次都 cancelled 左,最早一班係 2 點幾呢~(如果其他網友要去,最好去之前打個電話去問,或者 上網 check check 依家個情況先去,否則就好似我地咁白行一趟 lu~)。

至於 dinner ,我地都仍然係食酒店o既懷石料理,不過食左咁多餐,真係已經覺得冇乜野咁特別 lu,同埋今日我訂呢個餐 都算係一個平o既 package ,所以我亦都冇好高o既要求,但係其中最令我地 surprise o既,竟然係佢個餐入面有..鯨魚肉 沙律!睇落去紅紅一片,一試之下...嘩,超肥膩呀!真係麻麻地,唔多好味,佢地就話鯨魚住係深海,緊係肥啦~~

食飽之後差唔多 8 點,我地返房做足準備先去會場,因為今日出面實在係太凍啦,而且又好大風,所以真係要準備充足先 好出去,另外,當然仲要套返個釘鞋落去對鞋度,唔會咁易滑到嘛。去到入口,1 人比左 100 yen,跟住我先發現,其實係唔 駛入場費o既喎,比幾多 yen 都得,早知就 1 人比 10 yen 啦~

入左場,我地分開左 2 批人自己行,本來諗住約 2 個鐘之後一齊走,因為我同 Gary 就最主要係影相啦,至於佢地, 就覺得行唔到咁耐,所以都諗住行完佢地自己返酒店先。點知,最後大家真係由 8 點幾行到差唔多 10 點,仲一齊返酒店添。 冬天的北海道,除了雪就是冰,係層雲峽的冰瀑祭,就係用一大塊一大塊的巨冰雕刻出大自然的奇觀,雖然冇城堡、卡通公仔 等等,但係佢有冰神社、長長o既冰洞,而最好參觀o既時間,就係夜晚上開晒燈o既時候,七彩繽紛的燈光係晶瑩o的冰透出來 果時,就係好似置身仙境咁,實在難忘。

   

   

   

駕駛資料:

起點 終點 距離 料金 預定時間 實際時間 備註
常呂町 網走 46 km 50 mins 30 mins
網走 層雲峽 147 km 4,613 yen 180 mins ~150 mins

Day 7: 2007/02/28 釧路、網走

Day 7: 02/28 (Wed) 晴

阿寒湖  釧路  網走常呂町

早餐:阿寒湖-あかん鶴雅別荘 鄙の座 之 1 泊 2 食
午餐:釧路-和商市場
晚餐:常呂町-民宿 船長の家 之 1 泊 2 食

住:常呂町-民宿 船長の家
訂房方法:經 email 網上預訂之後再直接打電話去 re-confirm (註:email 同電話都要用日文,我呢度有個 Sample fax file 可以 用黎預約,不過 fax 完去之後記得打電話去呀)
 
一早起身又去左浸溫泉,順便洗頭沖涼(嘻嘻),之後就食早餐,都係去返尋晚果個「食事處」,由返同一個 職員 serve 我地。今朝又係食日式早餐,可以揀白飯或者白粥,不過我地開頭唔明咩白粥個日文,阿職員就解釋左好耐, 形容係點樣整,之後佢問我地識唔識漢字,拎左張寫左中文字o既 menu 比我地睇,逐樣逐樣咁解釋比我地知邊樣醬料係 食咩野用,真係麻煩晒佢 lu ~

 

 食飽飽我地又要出發啦,今日我地去睇釧路丹頂鶴,根據手頭上o既資料,有幾個地方都有丹頂鶴睇,於是我就揀左 最近果個地方:丹頂鶴公園(都要渣差唔多一個鐘頭車呢~),點知....去到....原來係一個公園!本來我係諗住睇野生o既 丹頂鶴,變左..係公園入面,比人困住,係籠入面,人工飼養果 d 丹頂鶴,真係好失望。仲有就係,果度得十幾隻丹頂鶴 咋,其他乜都冇,仲要比入場費,雖然唔多,只係 310 Yen,但係早知係咁我連入都唔入啦。不過,好彩o既就係,果度 竟然有好多野生麻鷹同埋白鴿,所以我地反且係度影左唔少麻鷹o既相呢。

 

我地係果公園留左大半個鐘之後,大家都諗住走啦,因為真係冇乜野好睇。大家見我咁唔憤氣,又有少少時間,就話不如 渣去另一邊,即係濕原瞭望台果邊,咁我就 check 下要幾遠啦,大約要 45 分鐘車喎,咁我話,如果我地 lunch 唔食鐵板燒, 食壽司飯,就可以偷到 d 時間,咁終於大家就又再出發去搵呢 d 咁典雅o既丹頂鶴啦。

今次我地o既目的地係細岡釧路濕原國立公園o既瞭望台,沿途風景真係好靚,有小橋流水,仲經過火車路軌,我心諗, 一陣回程有時間真係要停低影下相先得。去到果度,停好車拎晒野準備去搵丹頂鶴o既時候,發現去觀望台果條上山小路竟然 比大雪埋沒左!!雖然個路牌話只需 5 分鐘左右就可以上到去,不過果個樣....好似超滑咁..所以最終我地都係放 棄左行上去,就真係好似我黎果時咁諗,回程我地係果 d 河呀、路軌果度影左好多靚相,仲咁o岩有架火車經過添!

 

跟住我地就返釧路,因為今日要趕搭 1:53pm 開出o既普通列車,去塘路度 轉SL 冬の湿原号返釧路,所以 我就揀左係釧路旁邊o既和商市場o既勝手井做今日o既 lunch 啦, 由於時間o既關係,我地好快咁係個市場度行左一個圈,就揀左一間舖頭,係果度買晒所以o既野,過程真係好似香港買車仔麵咁,仲有好多種刺身揀添。

 

跟住就好快咁走去火車站啦,好彩去到車站o既時候只係大約 1:38pm,都仲有成 15 分鐘左右先開車,雖然我一早已經 買左 SL o既車票,但係普通果架車我地都仲係要買飛,有時真係越急個人就越做錯野,去到售票機,竟然禁黎禁去都買唔 到飛喎!原來我禁左幾次都禁錯左,好彩後尾都攪掂。跟住入到先,見唔到月台有車喎,但係另一個月台就有架車停左係度, 咁我先諗起,唔知我地果架係邊個月台上車!最後都係問左車站 d 職員,先知原來停係另一個月台果架就係我地要搭o既車, 唯有快快咁走過去啦,咁最後都趕得切上車。

我地去程坐呢架普通o既火車係一架細火車黎o既,大約 20 分鐘到我地就到塘路啦,仲見到 SL 冬の湿原号已經停左係 對面,咁我地就好快咁走左過去,(除左我地,仲有幾個乘客都係咁搭呢),上左 SL 冬の湿原号之後,見佢準備開車o既時 候,發現左我地得返 3 個人!唔見左 Eppie !冇理由喎,我明明見到佢有落車,但係過左幾分鐘都唔見佢o既,而 SL 冬の湿原号 個車長又要開車,我地唯有叫住車長唔好開車住,由細姨走左落去搵去,好彩呢個時候終於見到佢o既身影啦,仲身 水身汗咁走過黎,後尾問佢咩野事,原來佢落車果時搵唔到果張普通車飛,唔鬼知去左邊度,摷左好耐先摷到。跟住 我話佢知,要幾個鐘先有一班車,佢果時先知驚啦~~(今日真係發生好多事故呀!!)

SL 冬の湿原号比我想像都有幾大o既分別,就係..原來佢都行得好快o家,我仲以為呢 d 用煤發動o既蒸汽火車係行得好 慢添,行果唔夠 30 分鐘o既車程入面,我地真係見到一群野生o既鹿夷鹿添!可惜架車行得太快,影唔到佢地囉~

返到 JR 站之後,我地就向另一間民宿出發,佢就係位於常呂町o既 船長の家啦,呢間有乜特別,佢o既賣點是包括係 1 泊 2 食入面o的廿幾道菜式海鮮晚餐,包括:原隻蒸鱈場蟹及毛蟹、鱈場 蟹腳、蟹鍋、蟹肉飯、蟹湯、蟹腳沙律、蒸蠔及烚蠔、燒帶子及芝士帶子、北寄貝、八爪魚、海螺及多款魚類菜式,甜品還有芝 士蛋糕,你話係咪聽落已經落晒口水呀。而佢o既早餐亦都唔弱,差唔多有 10 個菜式,就以魚類為主。佢係一間普通o既旅館, 但係價錢唔貴,而且個環境都幾整潔,入面仲有一個小型o既風呂,不過我地就冇去啦,有一樣要注意o既,就係佢冇開床服務,要 自己舖床o既。

我地去到民宿已經差唔多 7 點,本來諗住 6 點可以去到,但係因為去到 5 點半左右,個天開始好黑,而沿途又冇街燈,但係又要 行山路,所以架架車都開得比較慢,大約係 40km 左右啦,而且去到尾後都好似荒山野嶺咁,係一個住宅區,不過好彩個 GPS 有佢登 記左,所以都唔駛點搵。點知去到 check-in,我地先發覺佢攪錯左我地個 booking ,以後我地係 4 個人 1 間房,淨係預左 1 間房比我地 咋,好彩果間係一間比較大o既房,所以都 ok 啦~

放好行李之後,當然係去食大餐啦,因為我地遲左黎,去到o既時候,其他人都差唔多食晒,所以我地見到有 d 菜式係唔同左, 不過,原隻鱈場蟹及毛蟹就一定有啦,一人有一隻毛蟹,同埋 2 個人有一隻好大o既鱈場蟹!最深刻o既就係..成隻活o既鱈場蟹放落你 面前個大煲果度蒸熟佢,我地一路食緊其他野、一路睇到佢變色同係度掙扎,真係好興奮!

 

雖然一開始張枱已經放到冇其他位置,但係職員仲一路拎其他野出黎,終於呢一餐我地食左 2 個幾鐘,食到成 10 點半。d 野食唔食 得晒?!咁都要問...當然係...食唔晒啦!好似 d 蟹飯、燒魚,大家都冇乜掂過,差 d 連 d 貴野都食唔晒。到最後,我地仲有 3 隻毛蟹係食唔晒,我提議留返第 2 日食,但係大家都話第 2 日冇時間,reject 左我~真係慘呀!!所以最尾我地淨係食左果 d 毛蟹o既 腳,其他都掉晒 lu,依家諗返起都覺得幾 side !

 

駕駛資料:

起點 終點 距離 料金 預定時間 實際時間 備註
阿寒湖 釧路 74 km 93 mins 70 mins
釧路 常呂町 198km 213 mins 220 mins 夜晚成條路都冇街燈,真係要開慢 d