December 2017
S M T W T F S
« Nov    
 12
3456789
10111213141516
17181920212223
24252627282930
31  

Day 4: 2007/11/15 沖繩

Day 4: 11/15 (Thu) 陰

沖繩西部  沖繩北部(海洋博公園、美ら海水旅館)  沖繩西部

早餐:酒店 Buffet 早餐-サンマリーナホテル
午餐:意粉-美ら海水旅館
晚餐:酒店懷石 Shabushabu-万座ビーチホテル&リゾート

住:沖繩西部-万座ビーチホテル&リゾート(Manza Beach Hotel & Resort)
訂房方法:經 Jalan 網上預訂

今朝係酒店食左個好豐富o既早餐啦,係自助餐形式o既,都幾多選擇,不過都係西式為主,本來今日有個行程去名護菠蘿園或者玩參加玻璃船 Tour 或浮 潛睇珊瑚,不過尋日都係決定唔去,所以今朝可以對住個無敵大海景慢慢歎早餐啦。

食飽之後,我地就 Check-out,今日o既目的地,係沖繩其中一個重要景點,就係北部o既海洋博公園同埋入面 o既美ら海水旅館(Okinawa Churaumi Aquarium)啦。呢個公園係全球第一個海洋博覽會 o既地點,入面有水族館、熱帶夢幻中心、海洋博公園等,而且仲有海豚鯨魚表演。要西海岸 Resort 呢邊渣車過去,大約要一個鐘,公園本身係免費入場, 但係水族館果邊就要 1,800 yen 入場費。

今日天氣麻麻地,好似會落雨咁,我地到左公園之後,先係出面周圍逛,之後就入左去美ら海水旅館啦。呢個水族館,可以話係全世界最大o既水族館,入面 有個好大o既水槽(好似係世界第二大,有四層樓咁高),養左兩條七米長O既大鯨鯊、好多巨型魔鬼魚同埋好多好多其他o既魚類!我地入到去果時咁o岩係餵魚 時間,見到有工作人員潛落水底餵魚,好多魚仔游黎游去,真係睇得好開心。係水族館入面有間餐廳,我地買完 lunch ,咁o岩等到張枱,仲可以坐係水缸隔離一路 食野,一路睇住 d 魚係面前游添。

  海洋博公園入面有好多由植物製成o既海洋生物、魚類

 

美ら海水旅館入面o既大水缸~見唔見到果兩條鯨鯊呀?!  

出左水族館後,我地去左睇海豚同埋鯨魚表演,呢個節目大約半個鐘啦,都有唔少人睇。

  海豚表演場地,後面係大海,本來望過去應該係水天一色,可惜今日天氣麻麻地~

 

大約半個鐘o既海豚、鯨魚表演,當然唔少得呢個鏡頭啦  

之後,我地再周圍行左陣,就渣車返西海岸今晚入住o既万座ビーチホテル& リゾート啦。呢間酒店位於萬座毛對面,係西海岸其中一間比較貴o既酒店,不過今日係一個特別日子,所以貴 d 就貴 d 啦!

  万座ビーチホテル&リゾート酒店外觀

 

呢間就係我地今晚住o既房,都唔係太大~  

我地係酒店 check 左聽朝想參加o既小型潛艇時間,book 左聽朝一早o既班次;另外,原來酒店早餐卷可以用黎比錢,咁我地計落,聽朝自己比錢食早餐, 用張卷

Day 3: 2007/11/14 沖繩

Day 3: 11/14 (Wed) 晴

那霸  沖繩西部

早餐:GRGホテル那覇
零食:果汁、薯條
午餐:海邊-沖繩料理
晚餐:沖繩西部-サンマリーナホテル BBQ

住:那霸-サンマリーナホテル(Sun Marina Hotel)
訂房方法:經 Jalan 網上預訂

今日我地冇咩野特別o既行程,主要都係由那霸市區渣車過西海岸渡假區果邊,今朝酒店係包早餐o既,但係個早餐... 真係冇野好食,只有小小袋裝麵包同埋菜沙律,而飲品就得茶同埋水。不過,咁平我都冇乜得投訴啦,所以只係食左少少,我地就出 發啦。

今次又好似早幾次旅行租車一樣,唔記得帶 CD 上車聽,所以係去西海岸途中,經過北谷果時,就去左 Jusco 度買 CD 啦,好似平時 都睇開 Music Station ,不過呢間 Jusco d 新碟都幾貴下,我地就買左 d 精選碟,其中一隻仲有 30% off 呢!我地到 Jusco 果時 大約係 9:45am 啦,成間 shop 真係冇乜人,好似o岩o岩開冇耐咁,行左大約一個鐘,完成左係我地 honeymoon o既第一次 shopping 之後就 走左啦。

大約 11:30am 左右我地就到左酒店,但係 check-in 時間又未到,咁我地就出左海邊影相啦,沖繩個海真係好靚~近沙灘o既地方 d 海 水係唔同顏色o既,比起香港個維港緊係清好多啦,而海天一色,望落去真係令人身心舒暢、心曠神怡。而呢個時間,雖然已經係 11 月中, 天氣又涼涼地,但係我地仍然見到好多人係度玩水上活動,好似有獨木舟、香蕉船等等,睇左佢地係度玩,真係覺得自己渡緊假~

沖繩個海靚過維港好多,望落去個海好多顏色

雖然已經係十一月,但係仲有唔少人係度玩水上活動喎

 

影到 1 點左右,個肚就開始餓餓地啦,又係時間搵野食,本來諗住係酒店 d 餐廳食,點知得 lunch buffet ,又係食埋果 d 野,咁我就 緊係唔想啦,所以我地就渣架車係酒店附近睇下有咩野食啦。其實沿路都有唔少餐廳,不過我地最後揀左一間係對住海o既家庭式餐廳,Gary 仲 話估唔到我會揀呢間添!我地對住個海食沖繩家庭式料理之餘,仲比我地見到有新人黎海邊影婚紗相添,而成個 menu 最攪笑係..佢竟然 有中國野食,我地就 order 左小籠包黎試下,又 ok 喎~

係海邊o既家庭式沖繩料理

雞翼係我o既 favourite food,當然要叫~

食飽之後,當然已經可以到酒店 check-in 啦,咁我地就返酒店啦,今次 book 左間中等大o既房,而且亦有對住海o既露台,你地估下我地 check-in 完之後做左 d 咩?!登登登...就係...覺晏覺啦~其實由婚前果日開始,大家都冇好好咁休息過,黎到今日,其實都好攰下啦, 咁見又冇咩特別行程,就覺左幾鐘,直到日落時份(約 5:00pm),我地就再落到沙灘果度影日落啦~

今晚我地住o既 Sun Marina Hotel,係一間 Resort type 酒店

間房都唔算細,仲有個小露台仔

訓左個晏覺之後,就日落 lu~真係 relax 啦~

日落緊係要落沙灘行下啦~你如邊個係我?!

最後,我揀左係酒店食海鮮 BBQ ,可惜果日有高校生黎旅行,近海果邊o既 BBQ 場地比佢地用左,我地要移師室內餐廳果度食。當然日本o既 BBQ 唔係港式自己用支叉叉住果隻啦,係似韓國燒烤多 d ,我地叫左 2 個唔同o既餐,加埋有和牛、黑豬、帶子、大蝦、龍蝦等等,真係好好味呀! 而食飽之後我地就訓 lu 。

今晚係酒店餐廳食鐵板燒,自己燒果隻,有得玩!

叫左兩個 Set,好味道~

Day 2: 2007/11/13 沖繩

Day 2: 11/13 (Tue) 晴

大阪關西空港  沖繩那霸空港  文化王國(王國村、玉泉洞)  首里城  那霸

早餐:Vendering Machines-燒飯團、綠茶
甜品:雪糕
午餐:文化王國-レストラン王國
晚餐:那霸國際通-首里天樓

住:那霸-GRGホテル那覇(GRG Hotel Naha)
訂房方法:經 Jalan 網上預訂

今朝一早我地就要搭內陸機到沖繩,我地 book o既酒店係冇包今朝早餐o既,因為本來果 plan 係今朝搭早機,諗住係機上食早餐, 後尾起身之後突然醒起日本o既內陸機係冇野餐o既,淨係得野飲...尋晚又冇出街搵野食喎,咁 Gary 就知道我如果今朝再冇野食呢 就一定會嘈嘈閉,所以佢係我梳洗緊o既時候就落左樓下 lobby d vendering machines 度買左早餐比我食啦,有燒飯團同埋綠茶,個飯團仲係熱o既,佢話買完之後要等差唔多 10 分鐘先有~食飽之後,我地就係酒店 Check Out,跟住就搭左 7:40am o既 shuttle bus 返機場 lu。

呢個就係好好味o既燒飯團啦~
 

因為架車遲左約 5 分鐘先開,所以去到機場已經差唔多 8:00am,我地今朝會搭全日空航空(航班編號 #NH1731),8:50am 由關西空港起飛,全程約 2 個鐘,係 11:10am 就會去到沖繩【那霸空港】,不過因為內陸機關係,我地只需要約 30 分鐘前去到 check-in 就得啦~

係內陸機上我叫左個雪糕,要 300 yen !

其實今次會揀沖繩,因為諗住 honeymoon 好多時 d 人會去 d 陽光與海灘o既地方,但係如果要我地兩個係果 d 地方玩 5 日,應該會悶死啦~不過唔去下 d resort 攤抖下,又好似差咁 d 野咁喎,所以揀左黎沖繩 5 日 4 夜啦~

今次係沖繩我地都係會渣車,所以落左機第一件事,就係去搵 Sky Rent-a-Car 個 shuttle 送迎站啦。都幾易搵,只要睇清楚機場入面 d 指示牌「レンタカー空港送迎バス乗り場」,全部租車o既站都係果度,每間租車 公司都有個職員係果度招呼你,跟住等左陣就有車黎啦,之後搭左大約 15 分鐘就到車場啦。今次係我地第一次幫襯呢間公司,平時都係租 開 Toyota ,點解今次揀呢間,因為佢真係好平,同樣一個車款,同樣咁多日,佢比 Toyota 平幾千 yen,不過...平野即係平野,Service 同 車內o既 GPS 係冇 Toyota 咁好,而且架車...仲傷痕累累添!所以大家如果要幫襯佢果時,記得要 check 清楚架車呀!

攪掂晒 d 手續,都差唔多 12 點 lu,咁我地就直接渣車到文化王國 (おきなわワールド Okinawa World)啦,車程差唔多要半個鐘,未入去參觀之前我地諗住係餐廳區食左野食,點知等左好耐先有位,之後又等左好耐先有野食,攪到成 2 點先食完先走人。我地先參觀文化王國,係門口附近見到個牌寫住 3:00pm 有琉球傳統舞蹈,(一日有四場,免費的,約 30 mins 一場),咁就係入面逛到差唔多 3 點就去左睇,都幾得意,有傳統琉球樂器介紹咁。

其實王國村入面冇乜特別野好睇,好快就可以行完,但係如果要入玉泉洞就一定包埋佢個入場劵,咁所以就去睇下囉。(註:文化王國分 3 部份-王國村、玉泉洞、蛇博物館,入場費:王國村 (600 yen),王國村 + 玉泉洞 (1,200 yen), Free Pass (1,600 yen))睇完場舞蹈之後,我地就去左參觀玉泉洞,佢其實係一個地底o既鐘乳洞,一入去入面就已經 feel 到好重o既濕氣,同埋好黑,d 鐘乳石都幾靚,我地影左好多相,係入面行左個幾鐘,因為入面冇乜人,最o岩影相~(後尾我地發覺最好o既路途應該係先去玉泉洞再去文化王國會順路 d o既。)

玉泉洞入面好多鐘乳石都改左個名

跟住我地就渣車去首里城,車程亦都係差唔多半個鐘,不過我地成 5 點先出發 ,去到都開始天黑 lu,所以呢邊亦都唔係太多人,我地又等佢開燈黎影相啦,終於又係度又停留左好耐,其中有個展覽館係要比入場費o既,仲要除鞋先可以入去,因為諗住那霸市中心果邊係放工時間會封路,所以我地就係呢邊慢慢行到約 7 點先離開啦。

首里城開左燈係咪靚 d 呢?!

酒店距離首里城好近,只需車程約 10 分鐘,不過因為塞車關係,我地用左差唔多成半個鐘先到,之後先到酒店 check-in 。呢間酒店個介紹話佢行去 國際通只需要約 10 分鐘,又平喎,好似好方便咁,所以當時就揀左佢啦。

係酒店放 好野之後我地就行去國際通果邊食飯,呢個時候我地先發現酒店附近竟然係紅燈區!有超多企街呀~~不過好彩由酒店行過去真係只係需要 10 分鐘咋~係國際通度我地搵左間食傳統沖繩料理o既舖頭,叫左出名o既苦瓜料理,我同 Gary 都係覺得苦瓜好難食呀!

呢間就係我地係國際通揀左o既餐廳啦~個外觀幾靚o家~

d 網友又話沖繩o既苦瓜好好味o既?!好難食呀...

食飽之後,本來諗住去旅遊資料中心搵 無人島 Tour,不過後尾都係決定唔去,Gary 話不如早 d 去渡假區果邊影下間酒店同海就算啦,佢對去 Tour 冇乜興趣喎,所以我地就改左行程啦,不過咁又慳返成萬 yen lu,最尾可以勁 shopping 呀~耶~~

Day 1: 2007/11/12 大阪

Day 1: 11/12 (Mon) 晴

香港  大阪關西空港

晚餐:飛機餐

住:關西-関空日根野ステーションホテル(Kanku Hineno Station Hotel)
訂房方法:經 Jalan 網上預訂

尋日攪掂晒結婚o既野,雖然好晏先訓,但係今朝係酒店好早就起左身,咁就諗住早 d check-out 之後早 d 去機場啦。我地先返左屋企,放好 d 野,再執執個喼同埋 check 清楚 d 物品,就出發 lu。

我地大約係 12noon 就去到機場,比起飛時間 早左成 3 個鐘,真係從未試過咁早去到機場,(因為次次都網上 check-in 左,只要約 45 mins 前去到就得),係 counter 寄左行李之 後,就走左去 Terminal 2 果邊食行左個轉同埋食 lunch 啦。

我地今次都係搭全日空航空(航班編號 #NH176),會係大阪停一晚,第二朝再早機落沖繩,2:55pm 起飛到日本,全程大約 3.5 個鐘,係 7:30pm 會去到大阪【関西国際空港】,今次過 custom 超快, 大約 7:45pm 就攪掂晒出左左 custom 啦。

我地今次係 Gate #36 上機,好遠啊~

經過上次去日光租車o既慘況,今次係網上 book 左電話,所以出左海關之後,好快咁走左去 ANA Sky Porter Counter 度拎電話,過程只需大約 3 mins, 又係超快!

因為第二朝就走,所以我就 book 左間係機場附近o既酒店,都幾平下,只係 5,400 yen (HK$365),而佢 8:00pm 有一班 shuttle bus 係機場出發,所以拎完電話就即時走去搵果個団体バス乗り場(南) S-11 ,好彩好快搵到架車,果時佢正準備開車(已經 8:00pm),咁我即時叫停佢,好彩車上冇其他人,所以司機就等埋我地先開車啦,搭左大約 15 mins 就去到酒店,check-in 果時我地再 confirm 第 二朝o既 shuttle bus (7:40am)。係酒店 check-in 之後我地就訓覺啦,今晚飯都冇食呢~

間酒店房都算係咁啦~仲比新宿果 d 大少少添~

2007/11 沖繩、京阪神、伊豆 (預定行程)

 

Day 1 11/12 (Mon) 香港  大阪關西空港
Day 2 11/13 (Tue) 大阪關西空港  沖繩那霸空港  文化王國(王國村、玉泉洞)  首里城  那霸(國際通)
Day 3 11/14 (Wed) 那霸  離島  沖繩西部(西海岸渡假區)
Day 4 11/15 (Thu) 沖繩西部  沖繩北部(海洋博公園、美之海水族館)  沖繩西部
Day 5 11/16 (Fri) 沖繩西部(萬座毛)  Orion 啤酒名護工場  沖繩 Duty Free Shop  那霸
Day 6 11/17 (Sat) 沖繩  大阪
Day 7 11/18 (Sun) 大阪  環球片場  大阪
Day 8 11/19 (Mon) 大阪  神戶(姬路城、名石大橋)  大阪
Day 9 11/20 (Tue) 大阪  京都(嵯峨嵐山、渡月橋、天龍寺、金閣寺、清水寺)  大阪
Day 10 11/21 (Wed) 大阪  中伊豆(修襌寺)  西伊豆(土肥、石廊崎)  中伊豆
Day 11 11/22 (Thu) 中伊豆(河津)  南伊豆(下田)
Day 12 11/23 (Fri) 南伊豆  東伊豆(伊豆高原、熱川、熱海)
Day 13 11/24 (Sat) 東伊豆  新宿
Day 14 11/25 (Sun) 新宿  成田空港  香港

2007/11 沖繩、京阪神、伊豆 (前言)

話說成親之事,說快不快,話繁不煩,籌備了十多個月的婚禮結束後很快便啓程踏上令人期待的悠長蜜月旅程。

涼風送爽,秋月無邊,入秋季節本來是旅遊的好時機;不過正值婚期後的仲秋日子歐遊或希臘都沒甚麼好看頭;日本東北奧入瀨溪流那邊的紅葉朝聖地又趕不及。

在多次朝秦暮楚後決定選定沖繩、京阪神及伊豆作為這次蜜月的旅遊點。

註:今次個前言係由 Gary 執筆o既~