February 2019
S M T W T F S
« Nov    
 12
3456789
10111213141516
17181920212223
2425262728  

2009/8/27 Day 62: 主廁廁所櫃、全屋燈飾安裝進行中~

8 月中訂造o既戶外餐枱椅話今晚會送到,咁我地就入左去收貨啦,本來仲諗要到 9 月頭先攪掂,實在係好快!

入到去,見到花園圍牆玻璃已經裝好晒,而前花園o既三盞柱頭燈、射燈、後花園射燈、車道o既除水光管都全部攪掂,用得!

跟住入屋睇睇,廚房枱面整好啦,而水龍頭同櫃底濾水器都裝好左~另外,假天花都整好左,而收口位o既黑鏡就整緊。

 

而兩個廳呢,客飯廳o既燈糟、飯廳飾櫃射燈、同埋飯廳燈都裝好左~不過有少少問題,就係客廳個飾櫃位,唔夠位裝我地支射燈,差 10cm 左右,攪到要再另外買多 2 盞比較矮o既~今次我地用左 3W LED 射燈,現燈睇個效果真係幾唔錯,不過今晚我用左閃光燈影,所以係 d 相度,果效果唔係好見到。

 

我地訂造o既戶外餐枱椅就暫時放左係個客廳度,總共有 8 張椅,4 張有扶手,4 張冇,其中 2 張有扶手o既係會放係書房用~而 d 椅又可以疊起,之後應該會放 4 張係後花園,仲有剩果 2 張會先收起囉~

跟住上樓睇睇,走廊燈同走廊飾櫃o既燈都已經用得 lu~

 

而書房同客房o既吊燈都裝好,不過好似低左少少,要叫師傅裝返高 d 。另外,書房吊櫃門都裝好,但係就未裝門柄~

另外,主人房之前欠左果個床架,都整好啦~呢個好好笑,因為係木工師傅唔記得左要做床架,佢諗住已經攪掂晒,佢 d 工具都已經運走左~咁我就同師傅話,我係地下 d 廢料度見到幾條木條,送左黎好耐,我一直以為係用黎做床架o既,點知又冇用到,不如拎黎用~咁佢話,係雜物房個門框用剩o既,之後就用左黎做個床架啦~所以依家個床架係有我個門線果條凹凸紋係中間o既~好靚~哈哈哈!

最後,就係個主廁啦,所有野都已經裝好左,包括浴缸、座廁、主櫃、鏡、側櫃~但係睇睇下,我就覺得點解同我開頭個 design 好似唔係好同咁,個主櫃好似細左喎!個鏡又唔係咁裝喎!仲有..個鏡燈同個側櫃點解咁高o家!

跟住,即刻拎把拉呎度下..個主櫃..本來應該係 125cm,依家得 105cm,細左足足 20 cm !本來塊鏡係打橫放,即係上下黑邊,比櫃短 20cm (兩邊各有 10cm 位剩),依家變得打直放,咁個鏡燈去到假天花咁高。另外,個側櫃,因為係要同塊鏡齊頂,變得好高好高呀~

嗚嗚~唔知點攪好~同老公傾過之後,有以下幾個解決方案:

1)淨係將塊鏡打返橫放,個側櫃同鏡燈就可以改返低 d ,望落去冇咁奇怪(最簡單快捷o既方法);

2)打返比做櫃果度,同佢講做錯左,要佢再造過!跟住所有野跟返開頭個 design 咁整(不過 1 星期應該唔夠時間?);

3)係香港買過另一個 125cm 長o既櫃,replace 左依家呢個,其他野就跟返開頭個 design (時間唔知要幾耐,櫃料可能同側櫃唔 match?!)

4)叫木工師傅即場再造 125cm 長o既櫃,replace 左依家呢個,其他野就跟返開頭個 design (應 2-3 日左右攪掂,但係櫃料都可能同側櫃唔 match!)

其他方法未諗到,各位 Blog 友有咩意見?!

2009/8/24 Day 59: 廚櫃枱面、主廁、圍牆玻璃安裝進行中~

本來都唔係好想寫,不過既然影左幾張相,就寫少少啦~

今日下晝廚櫃公司約左裝枱面,請左半日假,諗住等佢攪掂就比埋 d 尾數,亦都想現場檢查,有咩問題都可以即時攪掂嘛~

師傅 2:30pm 打黎,話會 3:00pm 左右入到去,話會裝大約 2 個幾鐘,咁我就大約 3:20pm 入到去,見到有半張枱面係度,但係又唔見人喎~等等等,等到 4:00pm 咁上下,都未見人,就打返比個枱面師傅,點知。。。佢話另一塊枱面整錯左!要拎返廠果度改!

Oh, my god ! 點解會咁o家,之後打比廚櫃公司去了解返件事,就話係放電磁爐個位開錯左少少,要返廠整,(香港廠,唔係大陸),咁最遲星期三就攪掂,咁我話,我唔可以拎咁多假入黎睇喎,佢就話叫我裝好,check 完之後先去佢地公司比錢就得啦,咁都好 d ~之後,廚櫃公司再打返比我,話聽日個枱面就得啦,下晝 3:00pm-6:00pm 會再黎裝,咁我就唯有聽日放工再入去睇睇啦~

呢張就係裝左一半o既枱面啦~

另外,我地上星期去郵局申請左搬遷服務,點知郵局整錯左個 effective date 係 8 月!所以,上星期六叫師傅幫我地整左個信箱先,今日見到已經攪掂啦~

而圍牆都開始裝緊玻璃,今日裝左一半左右,我估多一至兩日就會裝好 lu。

至於屋內面,冇咩大變動,師傅都係執緊 d 手尾,好似閣仔地板、樓梯邊o既o即膠,櫃o既玻璃等等~

另外,今日都同水電師傅傾左個主廁浴缸、龍頭位置等,又同佢講左之前買落o既燈、門鐘等等野比佢,應該呢個星期都會裝埋啦~

時鐘篇

一向以黎,我地屋企都係冇時鐘o既,而鐘又唔可以係人地送~之前我地就只係放左個小鬧鐘係廳個 woofer 上面,不過,自從佢壞左之後(都已經唔知壞左幾耐 ),我地就冇理過佢啦~

但係今次,我就話一定要係個廳度放個掛牆鐘,係文化石果幅牆度,但係又唔想要好普通果 d 圓形時鐘,咁就周圍睇啦~不過都係睇唔o岩,唔係太老土,就係太型,總之就同我地個 design 好唔夾~

後尾,老公訂信箱果時,比左 d 日本訂裝飾品o既 web site 我睇,咁我就終於係人地d web 度睇o岩左幾款啦!價錢就唔係太貴,淨係個鐘大約幾百蚊港紙,當然要再另加郵費啦,咁就諗住差唔多入伙先訂~

之後,我本住「我地祖國係世界o既工廠」呢個信念,就走左上淘寶度摷下~最後,真係比我搵到喎!咁就買左啦~

送到黎之後,發覺果幾支黑色時針比較難睇到,尤其係指住黑色字果時。咁我地就諗,不如將幾支針噴左做金色,應該會比較顯眼,最後得出呢個樣啦,而我地都好滿意~(鐘面仲有 d 發泡膠粒未抺走)

潔具篇 04 - 水龍頭

標題又「繼續」係水龍頭~仍然係冇打錯o既~

(老公註:今次係水龍頭 Revolution ,上一次係水龍頭 Reloaded 喎~

話說依家間屋已經開始埋尾,今朝同師傅傾晒全屋未整o既野,而一樓個主廁就到今時今日都仲未開始攪,咁我地就係度研究果個訂錯左o既浴缸,繼而講佢個水龍頭(跟浴缸原裝),師傅就話,到時壞左要整都幾麻煩,都係用返香港野好 d,跟住係返屋企途中,又諗下呢樣,又諗下果樣,就諗到,不如整多套水龍頭係個廁所度,到時真係壞左,都仲可以沖涼,而我又仍然可以浸浴同用佢個按摩喎,咁就打比師傅問佢得唔得啦,當然我地係問佢要加幾錢啦,好快就大家 deal 左,咁我地又要買多一套浴缸水龍頭連花灑啦~

呢次老公緊係乜都唔諗,即時就話出旺角聯興行買返 Grohe 啦~

浴缸水龍頭一開始就諗住買返 Essence 系列o既龍頭(連出水位),揀左 #33642 ,折後約 $1,900 ~

跟住就買花灑啦,呢個o既價錢,折完就由約 $700 至到 $20,000 都有!本來諗住買普通款,約千幾果 d ,但係依家興 Rain Shower ,咁又睇左 3 款,跟住同老公傾佢想要邊隻,佢又話由我話事,咁我當然係買 d 好玩又新奇o家啦~哈哈哈哈~

另外,老公話為左唔好辜負師傅幫我地搬左個熱水爐去另一邊,就決定比我買 Rain Shower 啦~比較過 Show 出黎果幾款之後,就揀左 Rain Shower System 入面o既 #27058,折完約 $8,500~呢款除左個 Rain Shower 頭之外,仲有個花灑仔,雖然係貴 d ,唯有同自己話,買左 2 個龍頭啦~呵~

兩樣加埋,淨係買水龍頭咁又成萬蚊啦,仲要加埋師傅改喉o既裝修費~

2009/8/19 Day 55: 門安裝完成,廚房假天花、油油、各樣修飾進行中~

呢個星期頭,同師傅講左想幾多號收樓之後,就開始 plan 幾時入去清潔、除蟲、搵人除甲醛、搵搬屋、搬寬頻、set network 等等~雖然仲有成個月先真正入伙,但係時間都好似唔係好夠咁,真係幾忙~

其實間屋依家都開始埋尾,大部份野都已經見到成形,不過今日都係心思思入去睇下有咩新發現~

今晚去到雖然已經較夜,但係第一樣見到就係:已經油緊外牆油啦~間屋即時唔同左,之前好似塊面生暗瘡咁,依家塊面就好似雞蛋咁滑啦~哈哈哈~

跟住一打開個舊大門,就見到新門已經裝左好,而大門個指紋鎖都已經攪掂(用膠紙包好左)~木工師傅真係勁~門較同門鎖都裝得好靚!而我地就用左暗氣鼓,冇整門頂o既~另外,我地再黎,全屋(除左什物房摺門之外)都已經裝好晒門啦~

正當我睇緊我揀o既呢個門款o既時候,突然聽到老公大叫,原來客廁趟門位置o既黑鏡修飾牆已經攪掂!師傅做野真係快,明明星期一下晝先打黎問我係灰鏡定茶鏡,我果時先再一次同佢講話係黑鏡,今日已經攪掂~抵我地個個星期六都買茶水比佢地飲~呵~

 

至於客廁,亦係假天花度裝好左燈~我地都係要求簡單款,所以都係做左最簡單o既圓燈~

地下都見到油油師傅繼續批灰同油油,樓梯同文化石牆位置都已經做好~見到佢應該係好有心機咁就住牆邊文化石形狀黎做o既~滿意!

另外,廚房就整好左假天花架,等呢個星期六裝埋枱面,下星期都應該有黑鏡、強化玻璃等等睇啦~

跟住上一樓睇睇~走廊櫃邊果塊玻璃已經做好,而一樓上閣仔o既樓梯玻璃,都大約裝好啦~本來仲想叫師傅唔好裝走廊櫃呢塊玻璃住,諗住搬完屋先裝,咁方便搬野添!

 

之後我地再研究左一樓 d 門o既裝工,都好滿意~

主人房地台就開始清潔,跟住應該會整個床架o卦?!其實我地只要一個約 1-2 吋高o既架,到時 zip 張床褥落去,等佢唔會周圍郁咋~

最後入埋書房睇下,兩幅牆o既白色焗漆玻璃已經裝好~而層架o既玻璃都已經攪掂 lu~而吊櫃o既玻璃門就見到已經送到,放左係電視櫃前,應該呢個星期會裝埋 lu~

 

而主廁,仲係未攪~唔知幾時會整呢~

潔具篇 03 – 座廁

話說係買樓冇耐後我地已經成日出旺角睇各樣潔具,其中一樣較重要o既係兩個廁所o既座廁。

經網上同街舖多番研究同親身感覺之後,發現原來座廁都有好多牌子,另外仲有分「一體式」、「分體式」等等,最終得出兩個目標牌子:Toto 同 Roca,而我地諗住揀比較傳統o既分體式。

另外,亦睇過電子廁板,係日本好 common o既,不過淨廁板都起碼要 $9000 左右,Toto 、panasonic 等都有出。今次係 budget 有限o既情況下,唯有唔整啦~

Toto

我地比較想買呢個牌子,因為較出名,覺得會穩陣 d ,應該冇咁易壞。但係出名o既代價就緊係貴 d 啦,係灣仔同旺角一帶,入門級數大約要 $4000 / set(連廁板)。

而比較多人買 #945 呢個 model。

Roca

另一個係旺角見到o既大牌子,都有好多款式,個樣亦都唔錯,入門價大約 $2000 / set (連廁板)。

睇左幾次之後,鎖定左 Roca 其中一個 model ,套裝價約 $2500 連樹脂油壓廁板,親身坐過都幾舒服,本來已經諗住出去落單啦,點知早幾日,係網上見到有人話係旺角買 Toto #945 都係約二千幾,咁係呢個情況之下,緊係買 Toto 唔買 Roca 啦。同埋,Roca 都有 d 唔好o既評價,好似買 Toto 穩陣 d 。

最後,皇天不負有心人,終於係旺角見到其他網友講o既舖頭,除左 #945 之外,仲有好幾款,都係約二千幾。咁我地最後就揀左同 #945 一樣 Function,只不過係外形唔同o既 #940,價錢係 $2150 (自由咀,連樹脂油壓廁板同送彈弓尾喉)。而 #945 就係 $2250,所以仲平 $100 呢!

舖名:藝彩家居

地址:上海街 673 號地下

電話:2396-9088

#945 有特別防污功能-CeFiONtect,當日係舖頭度,個職員同我講 #940 功能同 #945 一樣,但係後尾我上網睇,好似得 #945 有(詳情請參考呢度),不過我覺得呢個款又真係靚 d ,所以最終都係揀左呢個~